މި ސަރުކާރު ހިންގާނީ ހާމަކަންބޮޑު ޖަވާބުދާރީވަނިވި ގޮތެއްގައި ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އެ ޒިންމާދާރުކަން ރައީސް އޮފީހުން އެކަމަށް ހަވާލުކުރައްވާފައިވާ ފަރާތުން ނުދައްކާކަން ހާމަވެއްޖެއެވެ.

ރާއްޖޭގެ 59 ވަނަ މިނިވަން ދުވަހުގެ މުނާސަބާގައި ވާހަކަފުޅު ދައްކަވަމުން ރައީސް މުއިއްޒު ވަރަށް ބޮޑަށް އަމިއްލަފުޅާށް މެޑަލް ޖައްސަވާ ވަނީ ވާހަކަފުޅު ދައްކަވާފައެވެ. އެގޮތުން ރައްޔިތުން ބޭނުންވާ ކަންކަން އަހާ އޮޅުންފިލުވުމަށް ގިނަ ދޮރުތައް ހުޅުވާދެއްވާފައިވާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، މީޑިއާތަކުން ބޭނުންވާ މައުލޫމާތުތައް ހޯދުމަށް ފަސޭހަ ކޮށްދެއްވާނެކަމަށް ވެސް ވިދާޅުވެފައިވެއެވެ.

އެމަނިކުފާނު މިފަދަ ގޮތަކަށް ވާހަކަފުޅު ދައްކަވާފައިވީ ނަމަވެސް އެމަނިކުފާނުގެ އޮފީހުގެ އިސް ތަރުޖަމާނު އަދި ދައުލަތުގެ ވެސް އެންމެ އިސް ތަރުޖަމާނުގެ ފަރާތުން މައުލޫމާތު ހޯދުން ވަނީ ދަތި އުނދަގޫ ކަމަށް ވެފައިކަން ފާހަގަކޮށްލެވެއެވެ.

އެގޮތުން ޖުލައި މަހުގެ 10 ވަނަ ދުވަހުން ފެށިގެން މިއަދާ ހަމައަށް ވެސް ތޭރަ އޮންލައިނުން ސަރުކާރުގެ އެކި ކަންކަމާ ގުޅިގެން ކޮށްފައިވާ ތަފާތު ސުވާލުތަކަށް އެއްވެސް ޖަވާބެއް ހީނާ ވަލީދުގެ ފަރާތުން ލިބިފައިނުވެއެވެ. "ސީން ޒޯން"ގައި މެސުޖުތައް ހުރި އިރު މިއީ ކިހިނެއް ވެގެންވާ ކަމެއް އެނގިފައި ނެެތެވެ.

މައުލޫމާތު ހޯދަން މިހާ ފަސޭހަ ކަމަށް މެޑަލް ޖަހާ ސަރުކާރަކުން ބަހާ އަމަލާ ދިމާނުވެއެވެ. ނޫނީ މިއީ ވަކި މީޑިޔާއަކަށް ވުމުން ދިމާވާ ކަމެއްކަމާ މެދުވެސް އެހެންކަމުން ރައީސްގެ ވާހަކަފުޅަށް ފަހު ސުވާލު އުފެދެއެވެ.

އެއްވެސް މީޑިޔާއެއް ބްލެކް ލިސްޓުނުކޮށް ސަރުކާރު ހިންގާނެކަމުގެ ޔަގީންކަން ރައީސް އޮފީހުގެ މިނިސްޓަރު އިބްރާހިމު ޚަލީލު ދެއްވާފައިވީ ނަމަވެސް، މިފަދަ ކަންކަން ސަރުކާރުގެ ތަރުޖަމާނުގެ ފަރާތުން ދަނީ ތަކުރާރުވަމުންނެވެ. އަދި މިކަން މިނިސްޓަރު ޚަލީލުގެ ސަމާލުކަމަށް ގެނެސްފައިވީ ނަމަވެސް އަދިވެސް ހައްލެއް ލިބިފައިނުވެއެވެ.