"އިންޑިއާ އައުޓް" ކެމްޕެއިން އާއި އެކު މި ސަރުކާރުން ވެރިކަމަށް އައުމަށް ފެށި ދަތުރުގައި އިންޑިއާއަށް ދިވެހިރާއްޖެ އަޅުވެތިވެފައިވާވަރު ހާމަކޮށް އިންޑިއާ އަކީ ދިވެހިރާއްޖެއަށް ބޮޑު ބިރެއްގެ ގޮތުގައި ސިފަކުރި މީހުން މިއަދު އެ ގައުމަށް ގޮސް ރާއްޖެއަށް ފަތުރުވެރިން ފޮނުވުމަސް އެދި ސަލާން ޖަހަން ފަށައިފިއެވެ.

ފަތުރުވެރިކަމާއި ބެހޭ ވަޒީރު އިންޑިއާއަށް މިއަދު ކުރެއްވި ދަތުރުގައި ރާއްޖެ ޕްރޮމޯޓް ކުރުމުގެ ނަމުގައި އެގައުމުގެ މުމްބާއި އާއި ބެންގަލޫރުގެ ރޯޑްޝޯތަކުގައި ބައިވެރިވުމަށް ވަނީ ހަމަޖެހިފައެވެ.

ރާއްޖޭގެ ސަރުކާރުގެ ވުޒާރާތަކުގެ ތިން ޑެޕިއުޓީ މިނިސްޓަރުން އިންޑިއާގެ ބޮޑު ވަޒީރަށް ކުޑައިމީސްކޮށް ސޯޝަލް މީޑިޔާގައި ވާހަކަދައްކާފައިވުމާއި ގުޅިގެން އިންޑިއާ އަދި ރާއްޖެ ދެމެދު ވަރަށް ބޮޑު ނުތަނަވަސްކަމެއް އުފެދިގެން ވަނީ ގޮސްފައެވެ.

ނަމަވެސް ފެނިގެން ދިޔައީ އައުޓް ކުރަން ބޭނުންވި އިންޑިއާ މާ ބޮޑަށްވެސް އިންވެގެން ދިޔަ ތަނެވެ. އިންޑިއާ އާއި ނުލާ ދިވެހިރާއްޖެ ނުހިންގޭ ހިސާބަށް ގުޅުން ގާއިމުކުރުމަށް މަސައްކަތް ކުރަމުންދާތަން ދަނީ ފެންނަމުންނެވެ. އިންޑިއާ އާއި އެކު ގިނަ މަޝްރޫއުތަކެއްގައި ސޮއިކޮށް ރާއްޖޭގެ އެންމެ އަރިސް ގައުމަކަށް އިންޑިޔާވެ ނިމިއްޖެއެވެ.