މޯލްޑިވްސް ކޮލިފިކޭޝަންސް އޮތޯރިޓީގެ ފަރާތުން ކުރިއަށް ދިޔަ އެވިޑް ކޮލެޖްގެ ރެންޑަމް ބެޗް އޮޑިޓް އާއި ގުޅިގެން 28 ޖުލައި ވަނަ ދުވަހު ފޮނުވި ސިޓީގައި "ޕްރޮގްރާމް އެކްރެޑިޓޭޝަން ގަވާއިދުގެ ދަށުން އެވިޑް ކޮލެޖަށް ފިޔަވަޅު އެޅުން" ގެޒެޓް ކުރުމާއި ގުޅިގެން އެ ކޮލެޖުން ކަންބޮޑުވުން ފާޅުކޮށްފިއެވެ.
މިކަމާއި ގުޅިގެން އެވިޑް ކޮލެޖުން ނެރެފައިވާ ނޫސް ބަޔާނެއްގައި މީގެ ކުރިން ކޮށްފައިވާ އޮޑިޓްތަކުން އެމް.ކިއު.އޭގެ އިރުޝާދުތަކާއި ކަނޑައަޅުއްވާފައިވާ ފެންވަރާއި މިންވަރަށް ކަންކަން އިސްލާހުކޮށް ރަނގަޅުކޮށްފައިވާ ކަމަށް ބުނެފައިވެއެވެ.
މީގެ އިތުރުން، މަތީގައި ދެންނެވިފައިވާ ސިޓީ ގެޒެޓް ކުރެވުމާއި ހަމައަށް މިކަމާއި ގުޅޭ އެއްވެސް ލިޔެކިޔުމެއް ނުވަތަ އަންގަން ޖެހޭ ފަރާތަކަށް އަންގާފައިނުވާ ކަމަށްވެސް އެ ކޮލެޖުގެ ބަޔާނުގައި ފާހަގަކޮށްފައިވެއެވެ.
މިއާއިއެކު ގާނޫނާއި ހަމަތަކާއި އެއްގޮތްވާ ގޮތުގެ މަތިން މިފަދަ ފިޔަވަޅުތައް އެޅުމަށްވެސް ގޮވާލާފައިވެއެވެ.
އެމް.ކިއު.އޭގެ ފަރާތުން އެވިޑް ކޮލެޖާއިމެދު އަމަލުކޮށްފައިވާ ގޮތާއި ނިންމަވާފައިވާ ނިންމުންތައް ކުށްވެރިކޮށް މިކަންކަން ތަޢުނުކޮށް ގާނޫނީ ފިޔަވަޅު އަޅުއްވާނެކަމަށްވެސް ބުނެފައިވެއެވެ.
