ރިޔާސީ އިންތިޚާބުގެ ރިޔާސީ ބަހުސްގައި ވާހަކަދައްކަވަމުން މިހާރުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމާއި ހަވާލުވާ ދުވަހަކުން ރައީސް އޮފީހުން ކޯޓުތަކަށް އަތް ބޭނުން ހުއްޓުވާނެކަމަށް ބުނި ބުނުމަށް ގާނޫނީ ވަކީލު އަލްއުސްތާޛު އާދަމް އާސިފު ފާޑު ވިދާޅުވެއްޖެއެވެ.
އާސިފު އިތުރަށް ވިދާޅުވީ މިހާރު ސަރުކާރުގެ އިސް ސަފުގައި ތިއްބެވި ބޭފުޅުންތަކުގެ ކޮރަޕްޝަން އަމަލުތައް ސާފުކޮށް ފެންނަން ހުރި އެ ބޭފުޅުންނާއި ދެކޮޅަށް ފިޔަވަޅު އަޅުއްވަން މުއިއްޒުއަށް ކެރިވަޑައިނުގަންނަވާނެ ކަމަށެވެ. މުއިއްޒު އަކީ ކޮމްޕްރޮމައިސް ވެފައިވާ އަދި އެ ބޭފުޅުންނާއި ޑީލް ހައްދަވައިގެން ވެރިކަމަށް އައިސްފައިވާ ފަރާތެއްކަމަށް އާސިފު ފާހަގަކުރެއްވިއެވެ.
މީގެ އިތުރުން މިނިވަން ދުވަހާއި ދިމާކޮށް މި ސަރުކާރުން ކޮރަޕްޝަންގެ މައްސަލަތައް ބެއްލެވި ވަރަކަށް އެހެން ސަރުކާރަކުން ބަލާފައިނުވާ ކަމަށް ބުނެ މުއިއްޒު އިތުރުފުޅު ހައްދަވާފައިވާކަމަށް އާސިފު ބުނެފައިވެއެވެ.
އަދި އަމިއްލައަށް މުނާފިގުންގެ ސިފަތައް ބަޔާންކުރައްވާ ވާހަކަދެއްކެވިއިރު، ރައީސް މުއިއްޒު ވެވަޑައިގެންނެވި އެއްވެސް ވައުދަތަކަށް އަމާނާތްތެރިވިންތޯ އާސިފް ސުވާލު އުފައްދަވާފައިވެއެވެ.
