އުތުރު ތިލަފަޅުގެ އެއްބަސްވުން ހާމަކުރާނެކަމުގެ ވައުދާއެކުގައި ވެރިކަމަށް އައިސް އެތަނުގައި އިންޑިޔާ ސިފައިން ބައިތިއްބައިގެން މި ސަރުކާރުން ވެސް އުޅޭތީ އުސްތާޒް އާދަމް އާސިފް ފާޑުވިދާޅުވެއްޖެ އެވެ.
އާސިފް މިފަދައިން ވިދާޅުވެފައި ވަނީ ބުރާސްފަތި ދުވަހުގެ ރޭ ފްރޮެންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.
2023 ވަނަ އަހަރުގެ ރިޔާސީ އިންތިޚާބްގެ ކެމްޕެއިން ތެރޭގައި ރައީސް ޑރ މުހައްމަދު މުއިއްޒު އެންމެ ގަދަަޔަށް ދެއްކެވި އެއްވާހަކައަކީ ޔޫޓީއެފް އެއްބަސްވުން ހާމަކޮށްދެއްވާނެކަމުގެ ވާހަކައެވެ. އެހެން ނަމަވެސް ވެެރިކަމަށް އެއް އަހަރު ވެގެންދާއިރު ވެސް އެކަން ނުކޮށް ބަހާނަތައް ދައްކަވަމުން ގެންދާތީ އާސިފް ވަނީ ވަރަށް ބޮޑަށް ފާޑުވިދާޅުވެފައެވެ.
އެހެން ގައުމެއްގެ އަސްކަރިއްޔާ މި ގައުމުގައި ބައިތިއްބައިގެން ރައްޔިތުންނަށް އޮޅުވާލާ ދޮގުތައް ހަދާފާއިވާތީ ރައީސް މުއިއްޒަކީ ބޮޑު ތިލަދުންމައްޗައް ނިސްބަތްވާ މީހެއްކަމަށް ގަބޫލު ނުކުރާކަމަށް އާސިފް ވަނީ ވިދާޅުވެފައެވެ.
އެހެންވީމާ، އަޅުގަނޑުވެސް ފާހަގަކުރާނަން، ކޮންމެވެސް ދޯޕާންވާލާއެއް ވެރިކަމަށް އައިސް ފުންމާމިލީ. މިއީ ދިވެއްސެއް ނޫން އިނގޭތޯ. މިއީކީ ބޮޑު ތިލަދުންމަތީ ދަރިއެއްކަމަކަށް އަޅުގަނޑު ގަބޫލެއް ނުކުރަން.
އާސިފް ވިދާޅުވިއެވެ.
ބޮޑު ތިލަދުންމަތީގެ ދަރިން ކަމަށްވާ ޝަހީދު ހުސެއިން އާދަމްއާ މުހައްމަދު ތަކުރުފާނާ ގައުމަށްޓަކައި ވެވަޑައިގެންނެވި ފަދަ މަތިވެރި ގުރުބާނީ އެއް ވެވަޑައިގެންނަން ރައީސް މުއިއްޒު ޖެހިލުންވެ ވަޑައިގަންނަވާނެކަމަށް ވެސް އާސިފް ވަަނީ ވިދާޅުވެފައެވެ.
