އަނަސްގެ މަރަށް ހަތް އަހަރު ވެގެން ދިޔަ އިރުވެސް އިންސާފެއް ނުލިބޭތީ، ރޭ މީދޫގައި15 މިނެޓަށް އެއްވަގުތެއްގައި މަގު ބައްތިތައް ނިއްވާލާ މުޅި ރަށް އަނދިރިކޮށްލައިފިއެވެ.

އަނިޔާވެރި ގޮތަކަށް މަރާލާފައިވާ ރ.މީދޫ، ފެންފިޔާޒުގެ މުހައްމަދު އަނަސްގެ މަރަށް ހަތް އަހަރު ފުރުން ފާހަގަ ކުރުމުގެ ގޮތުން، އެ މަރުގެ އިންސާފަށް އެދި އެ ރަށުގެ ހުރިހާ މަގު ބައްތިތައް މިރޭ ނިއްވާލުމަށް މީދޫ ކައުންސިލުން ވަނީ ނިންމާފައެވެ.

2017 ވަނަ އަހަރުގެ ޖުލައި މަހުގެ31 ވަނަ ދުވަހުގެ ރޭގެ ވަގުތެއްގައި އަނަސްއަށް ހަމަލާދީ މަރާލާފައިވަނީ، ތޫނު އެއްޗެހި ތަކެއް ހިފައިގެން ހަމަލާ ދިނުމަށް އައި ގުރޫޕަކާއި ފިލުމަށް ލިޓަސް ސާރވިސް ސެންޓަރު ތެރެއަށް ވަނުމުން އެތާ ތެރޭގައެވެ.

އަނަސްގެ މަރުގެ މައްސަލައާއި ގުޅިގެން ދައުވާ ކޮށްފައިވަނީ، ދަފްތަރު ނަންބަރު1746 ސިމާހު މޫސާ އާއި ސ.ފޭދޫ ވެސްޓަންވިލާ ހަސަން މަހްފޫޒް އާއި ތ. ކިނބިދޫ ގުލްފާމުގޭ މުހައްމަދު ޝާޒް އާއި ލ.ގަން ތުނޑީ، ނަންނާރިގެ ޖުނައިހު އަބްދުﷲ އާއި މ. ދިމިޝްގު އުސްމާން ޝަރީފާއި ޅ. ކުރެންދޫ އަސުރުމާގެ އަހުމަދު ޒަޔާނާއި މ. ލޮނުމިދިލިގޭ އަފްރާހު އަބްދުލް ރައްޒާގުގެ މައްޗަށެވެ.

ކްރިމިނަލް ކޯޓުން ވަނީ މިދިޔަ ފެބްރުއަރީ މަހުގެ2 ވަނަ ދުވަހުގައި އެމީހުންގެ މައްޗަށް ކުށް ސާބިތު ނުވާ ކަމަށް ހުކުމްކޮށް އެމީހުން މިނިވަން ކޮށްފައެވެ.

އަނަސް މަރާލި މައްސަލައިގައި ކުށް ސާބިތުވެފައިވަނީ17 އަހަރު ކުއްޖެއްގެ މައްޗަށެވެ. އެކުއްޖާގެ މައްޗަށް މިދަޔަ އަހަރު ވަނީ18 އަހަރުގެ ޖަލު ހުކުމެއް އިއްވާފައެވެ.