މާލެ ސިޓީގައި ސައިކަލު ވިއްކާ ފިހާރައެއް ކަމަށްވާ "ކިންގްސްޓަން މޯލްޑިވްސް" އިން ގިނަ ބައެއްގެ އަތުން ފައިސާ ނެގުމަށްފަހު ސައިކަލު ނުދޭތާ އަށް މަހަށް ވުރެ ގިނަ ދުވަސްވެއްޖެ އެވެ.

ކިންގްސްޓަންގެ މަޅީގައި ޖެހިފައިވާ ފަރާތެއް "ތޭރަ އޮންލައިން" އަށް މައުލޫމާތު ދެމުން ބުނީ މިދިޔަ އަހަރުގެ ޑިސެމްބަރު މަހު ފައިސާ ދައްކާފައިވާކަމަށެވެ. ކިންގްސްޓަން އިން ސައިކަލު "މި ހަފްތާ" ތެރޭ ދޭނެ ކަމަށް ބުނިތާ މިހާރު 8 ވަރަކަށް މަސް ވެފައިވާކަމަށެވެ.

އޭނާ އިތުރަށް ބުނީ ކިންގްސްޓަންގެ ޝޯރޫމަށް ދިޔަ ދުވަސްތަކުގައި މި މަޅީގައި ޖެހިފައި ތިބި އެތައް ބަޔަކާ ދިމާވެފައިވާކަމަށެވެ.

މިހާރު އެ އެންމެނާއެކު ވައިބާ ގްރޫޕެއް ވެސް ހަދާފާވާނެކަމަށާއި ޖުމްލަ 80 ވަރަކަށް މީހުން އެ ގްރޫޕްގައި އެބަތިބި ކަމަށް އެނާ ވަނީ ބުނެފައެވެ.

ސައިކަލް ގަންނަން ފައިސާ ދެއްކި ގިނަ ބަޔަކު ވަނީ ބުރާސްފަތި ދުވަހުގެ މެންދުރު ފަހުން ފެށިގެން އިރު އޮއްސެންދެން ކިންގްސްޓަން ފިހާރަ ތެރޭގައި އިހުތިޖާޖްކޮށްފައެވެ.

މި ސަރަހައްދައް ފުލުހުން އައިސްފާއިވާއިރު ކިންގްސްޓަންގެ އެއް ވެރިޔާ ވެސް ވަނީ އެ ސަރަހައްދަށް އައިސްފައެވެ.

ހުރިހާ ފަރާތްތަކުން ވެސް ފައިސާ ނޫނީ ސައިކަލު ވީއެންމެ އަވަހަކަށް ދިނުމަށް ބުނުމުން އޭނާ ވަނީ މި ހޮނިހިރުގައި ދޭނެ ކަމަށް ބުނެފައެވެ.

ނަމަވެސް މިކަމުގައި އެއްވެސް ޔަގީންކަމެއް ނެތްކަމަށް ވެސް ގިނަ ފަރާތްތަކުން ބުނެއެވެ.

ސޯޝަލް މީޑިޔާގައި ވެސް ގިނަ ފަރާތްތަކުން އަންނަނީ ކިންގްސްޓަން ބޮއިކޮޓް ކުރުމަށް ގޮވާލަމުންނެވެ.