އިރާންގައި އަަވަހާރަކޮށްލި ހަމާސްގެ ލީޑަރު އިސްމާއިލް ހަނިއްޔާގެ މައްޗަށް ރާއްޖޭގައި ޣައިބަށް ކަށުނަމާދު ކުރަން އަދާލަތުންނާއި އަދި ގިނަ ބަޔަކު ގޮވަން ފަށައިފިއެވެ.

އިރާންގެ އާ ރައީސް ހުވާ ކުރެއްވުމުގެ ރަސްމިއްޔާތަށް ވަޑައިގެން އުޅުއްވަނިކޮށް ހަމާސް ޖަމާއަތުގެ ސިޔާސީ ގޮފީގެ އިސްވެރިޔާ ހަނިއްޔާ މިދިޔަ ބުދަ ދުވަހު ޝަހީދުކޮށްލީ ޔަހޫދީން އީރާނުގެ ވެރިރަށް ތެހެރާންގައި ދިން ބޮމުގެ ހަމަލާއެއްގައެވެ. މި ހަމަލާއާއެކު އިރާންގެ ސެކިއުރިޓީއާ މެދު ވަނީ ވަރަށް ބޮޑަށް ސުވާލު އުފެދިފައެވެ. ހަމާސް އިން ތުހުމަތު ކުރާ ގޮތުގައި މި ހަމަލާ ދިނީ އިސްރާއީލުންނެވެ. އެކަމަކު، އިސްރާއީލުން މިކަމާ ގުޅޭ ގޮތުން އެއްވެސް އެއްޗެއް ނުބުނެއެވެ.

ހަނިއްޔާގެ މައްޗަށް ކަށުނަމާދު ކުރާނީ ގަތަރުގެ ވެރިރަށް ދޯހާގައި ހުންނަ އެންމެ ބޮޑު މިސްކިތް ކަމަށްވާ އިމާމް މުހައްމަދު ބިން އަބްދުލްވައްހާބު މިސްކިތުގައެވެ. ކަށު ނަމާދު ބޭއްވުމަށް ހަމަޖެހިފައި ވަނީ މިއަދުގެ ހުކުރު ނަމާދަށް ފަހުގައެވެ. ހަނިއްޔާ ފަސްދާނުލާނީ ދޯހާގެ އުތުރުގައި އޮންނަ ލުސައިލްގެ ގަބުރުސްތާނުގައި ކަމަށްވެއެވެ. ގަތަރުގައި ބާއްވާ ޖަނާޒާގައި އަރަބި އަދި އިސްލާމީ އެކި ގައުމުތަކުގެ ވެރިން ވެސް ބައިވެރިވެ ވަޑައިގަންނަވާނެ ކަމަށްވެއެވެ.

މުސްލިމް ހުރިހާ ގައުމެއްގައި ހަނިއްޔާގެ މައްޗަށް ޣައިބަށް ކަށުނަމާދު ކުރުމަށް ހަމާސް އިން ވަނީ ގޮވާލައިފައެވެ. އަދި އެ ގޮވާލުމަށް އިޖާބަ ދެއްވައި ރާއްޖޭގެ ބައެއް އިލްމުވެރިން ވެސް ވަނީ ރާއްޖޭގެ މީހުން ދިރިއުޅޭ ހުރިހާ ރަށެއްގެ މިސްކިތްތަކެއްގައި ޣައިބަށް ކަށު ނަމާދު ކުރަން އެދިފައެވެ.

އަދާލަތު ޕާޓީން އިސްލާމިކް މިނިސްޓަރު ޑރ. މުހައްމަދު ޝަހީމަށް ފޮނުވި ސިޓީގައި ބުނެފައި ވަނީ ހަނިއްޔާއަކީ ފަލަސްތީނުގެ މިނިވަންކަމާއި އިސްލާމީ އުންމަތަށްޓަކައި މަތިވެރި ގުރުބާނީތަކެއް ވެވަޑައިގެންނެވި އަބުތާލެއް ކަމަށާއި، އެފަދަ ބޭފުޅުންގެ އަގު ވަޒަން ކުރުމަކީ އުންމަތުގެ ކޮންމެ ފަރުކު ވެސް ކުރަންޖެހޭ ކަމެއް ކަމަށެވެ. އެހެންވެ، ރާއްޖޭގައި ހުކުރު ކުރާ ހުރިހާ މިސްކިތެއްގައި މިއަދުގެ ހުކުރު ނަމާދަށް ފަހު ހަނިއްޔާގެ މައްޗަށް ޣައިބަށް ކަށު ނަމާދު ކުރުމުގެ އިންތިޒާމު ހަމަޖައްސައި ދެއްވުމަށް އެދިފައިވެއެވެ.

ހަނިއްޔާ އަވަހާރަކޮށްލުމާ ގުޅިގެން ދިވެހި ސަރުކާރުން ވަނީ އެ ހަމަލާ ކުށްވެރި ކުރި އިރު ސަހްޔޫނީންގެ ނަން ހާމަކޮށްފައިނުވާތީ ގިނަ ބަޔަކު ދަނީ ފާޑުކިޔަމުންނެވެ.