ސައިކަލު ނޫނީ ޕޭމަންޓް ހޮނިހިރު ދުވަހު ދޭނެކަމަށް ބުނެ ނުދިނުމުން، މާލޭގައި ސައިކަލު ވިއްކާ "ކިންގްސްޓަން" ގެ މަޅީގައި ޖެހުނު ފަރާތްތައް ކިންގްސްޓަންގެ ޝޯރޫމްގައި މުޒާހަރާކޮށްފިއެވެ.

އެ ސަރަހައްދައް އެއްވެ އުޅުނު ފަރާތްތަކުގެ ތެރެއިން ފަރާތެއް "ތޭރަ އޮންލައިން" އަށް މައުލޫމާތު ދެމުން ބުނީ ސައިކަލު ނޫނީ ޕޭމަންޓް ހޮނިހިރު ދުވަހު ދޭން ބުނި އިރު ވެސް ކިންގްސްޓަންގެ ވެރިޔާއަށް އިތުބާރު ނުކުރާކަމަށެވެ.

އޭނާ ބުނި ގޮތުގައި ނިމިދިޔަ 8 މަސް ދުވަހު ކިންގްސްޓަން އިން ވަނީ އެތައް ބަޔަކަށް އޮޅުވާލާ ދޮގު ހަދާ އެމީހުންގެ ފައިސާ އަތުލާފައެވެ.

ހޮނިހިރު ދުވަހު ވެސް ފުލުހުން ވަނީ ކިންގްސްޓަންގެ ޝޯރޫމަށް ގޮސްފައެވެ. އަދި މުޒާހަރާގެ ބައިވެރިންނާ ވާހަކަ ދެއްކުމަށްފަހު ހުރިހާ ފަރާތްތަކުން ވެސް މައްސަލަ ހުށަހެޅުމަށް އެދިފައެވެ.

ކިންގްސްޓަންގެ މަޅީގައި ޖެހިފައިވާ ފަރާތެއް "ތޭރަ އޮންލައިން" އަށް މައުލޫމާތު ދެމުން ބުނީ މިދިޔަ އަހަރުގެ ޑިސެމްބަރު މަހު ފައިސާ ދައްކާފައިވާކަމަށެވެ. ކިންގްސްޓަން އިން ސައިކަލު "މި ހަފްތާ" ތެރޭ ދޭނެ ކަމަށް ބުނިތާ މިހާރު 8 ވަރަކަށް މަސް ވެފައިވާކަމަށެވެ.

އޭނާ އިތުރަށް ބުނީ ކިންގްސްޓަންގެ ޝޯރޫމަށް ދިޔަ ދުވަސްތަކުގައި މި މަޅީގައި ޖެހިފައި ތިބި އެތައް ބަޔަކާ ދިމާވެފައިވާކަމަށެވެ.

މިހާރު އެ އެންމެނާއެކު ވައިބާ ގްރޫޕެއް ވެސް ހަދާފާވާނެކަމަށާއި ޖުމްލަ 80 ވަރަކަށް މީހުން އެ ގްރޫޕްގައި އެބަތިބި ކަމަށް އެނާ ވަނީ ބުނެފައެވެ.

ސައިކަލް ގަންނަން ފައިސާ ދެއްކި ގިނަ ބަޔަކު ވަނީ ކިންގްސްޓަން ބޮއިކޮޓް ކުރުމަށް ގޮވާލާފައެވެ.