ގޭބިސީތަށް ފޮނުވާ ކަރަންޓް ބިލަށް މަކަރު ނުހަދާނެ ކަމަށާއި، ކަރަންޓު މީޓަރުތަކާއި ޕަވަ ސިސްޓަމާ ކުޅެގެން މަކަރެއް ނަހަދާނެ ކަމުގެ ޔަގީންކަން ސްޓެލްކޯއިން ދީފައިވާއިރު އަނެއްކާވެސް ކަރަންޓް ބިލު ބޮޑުވެފައިވާ މައްސަލަ ފެންމަތިވެއްޖެއެވެ.

ސޯޝަލް މީޑިޔާގެ އެކި މަންސަތަކުގައި ގިނަ އަދަދެއްގެ ބަޔަކު އަންނަނީ ބިލު ބޮޑުވެގެން އެކަމުގެ ޝަކުވާ ކުރަމުންނެވެ. ރާއްޖޭގެ އިގްތިސާދީ ހާލަތު ދަށްވެފައިވުމުން މިއީ ސަރުކާރުން ގަސްތުގައި ކުރަމުން އަންނަ ކަމެއް ކަމަށްވެސް މި ފަރާތްތަކުން އަންނަނީ ތުހުމަތު ކުރަމުންނެވެ.

ރައްޔިތުންގެ މި ޝަކުވާތަކާއި ހުރެ ކަރަންޓު ބިލު ބޮޑުވާ ގޭބިސީތަކުގެ އެނާޖީ އޮޑިޓެއް ހަދަން ސްޓެލްކޯއިން ނިންމާފައިވާކަން ސްޓެލްކޯއިން ބޭއްވި ނޫސްވެރިންގެ އެ ބައްދަލުވުމުގައި ވާހަކަދައްކަވަމުން އެ ކުންފުނީގެ ޗީފް ޓެކްނިކަލް އޮފިސަރު އަހުމަދު އިގްބާލް ވިދާޅުވެފައިވެއެވެ.

މީގެ އިތުރުން، ސްޓެލްކޯ އިން ޕަވާ ސިސްޓަމާ ކުޅެގެން ކަރަންޓް ބިލު ބޮޑުކުރާ ވާހަކައަކީވެސް ދޭތެރެ ދެތޭރެއިން ދެކެވޭ އެއް ވާހަކައެވެ.

ކޮންމެ އަހަރަކުވެސް ކަރަންޓް ބިލްތައް ބޮޑުވުމުގެ ޝަކުވާއަކީ މާލެއާއި އަތޮޅުތަކުގައި ދިރިއުޅެމުން އަންނަ ރައްޔިތުންވެސް ކުރަމުން އަންނަ ޝަކުވާއަކަށްވާއިރު އާންމުކޮށް މި ޝަކުވާތައް ކުރިމަތިވަނީ ހޫނު މޫސުމުގެ ދުވަސްވަރެވެ. އެހެންނަމަވެސް މި އަހަރު އާދަޔާ ހިލާފަށް ކަރަންޓް ބިލުތައް ބޮޑުވެ، އަދިވެސް އެ ޝަކުވާތައް ކަރަންޓްގެ ހިދުމަތް ދެމުން އަންނަ ސްޓެލްކޯއަށް ދަނީ ހުށަހަޅަމުންކަން ފާހަގަކުރެވެއެވެ.