މި ސަރުކާރާ ދުރަށް ޖެހިވަޑައިގަތީ ސަރުކާރުގެ ނޭދެވޭ އަމަލުތައް ދިފާއުކުރުމަށް ބޭނުން ނުވާތީ ކަމަށް ރައީސް އަބްދު ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައި ވަނީ ފްރޮންޓް އޮފީހުގައި ބުރާސްފަތި ދުވަހުގެ ރޭ ކުރިޔަށްދިޔަ ޖަލްސާގައެވެ.

އެގޮތުން އެމަނިކުފާނު ވިދާޅުވީ ރާއްޖޭގެ ހާލަތު އޮތް ގޮތާއި ސަރުކާރުގެ ސިޔާސަތުތައް އުޑާއި ބިމާހާ ތަފާތު ކަމަށެވެ. ކަރަންޓު ބިލް ތިން ގުނައަށް ބޮޑުވެ، ރައްޔިތުންގެ ޖީބުތަކަށް ބަރުވެއްޖެ ކަމަށާއި ބޮޑެތި މައްސަލަަތައް ހުރި އިރު، ސަރުކާރުން ސިޔާސަތު ހަދަނީ އޯގާތެރި މުޖުތަމައެއް ބިނާ ކުރުމާއި އުފާވެރިކަން ހުރި މިންވަރު ބެލުމަށް، 'ހެޕިނެސް އިންޑެކްސް' ހެދުމާ ގުޅޭ ގޮތުން ކަމަށް ވިދާޅުވެ ރައީސް ޔާމީން ވަނީ ސަރުކާރަށް ފާޑުވިދާޅުވެފައެވެ.

ރައީސް ޔާމީން އިތުރަށް ވިދާޅުވީ އެމަނިކުފާނު ސަރުކާރާ ދެކޮޅު ނޫންކަމަށެވެ. އަދި ސަރުކާރު ވައްޓާލަން ބޭނުން ނުވާ ކަމަށާއި ބަޔަކު ކުރާ އެ ފަދަ މަސައްކަތެއްގައި ބައިވެރި ވެސް ވެވަޑައިނުގަންނަވާނެ ކަމަށް އެމަނިކުފާނު ތަކުރާރުކޮށް ވިދާޅުވިއެވެ.