ޕްރޮގްރެސިވް ކޮންގްރެސް ކޯލިޝަން ދޫކުރައްވާ ވަޑައިގެންނެވި ނަމަވެސް އެ ކޯލިޝަންގައި ހިމެނޭ ދެ ޕާޓީގެ އާންމު މެމްބަރުންނާ މެދު ހިތްޕުޅުގައި އޮތް ލޯތްބަށް ބަދަލެއް ނާންނަ ކަމަށާ އެކަން އެގޮތުގައި ދެމި އޮންނާނެ ކަމަށްވެސް އެ ކޯލިޝަންގެ ކުރީގެ ލީޑަރު، ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ ޕީޕީއެމް/ޕީއެންސީ ކޯލިޝަންގެ ލީޑަރޝިޕުން އެމަނިކުފާނަށް ކުރިމަތި ކުރުވި ފިއްތުންތަކުގެ ސަބަބުން އެ ކޯލިޝަންއިން ނުކުމެވަޑައިގެން، އުފައްދަވަން މަސައްކަތްޕުޅު ކުރައްވާ އައު ސިޔާސީ ޕާޓީއިން ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ.

ރައީސް ޔާމީންގެ ތާއީދާ އެކު ކުރިއަށް އޮތް މަޖިލީސް އިންތިހާބަށް ކުރިމަތިލާން ޝައުގުވެރިކަން ފާޅުކޮށްފައިވާ ކެންޑިޑޭޓުން ތައާރަފު ކުރުމަށް ދަ ފްރޮންޓް އޮފީހުގައި ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، ވެރިކަމުގައި ތިއްބެވި ބޭފުޅުންނާއި އެމަނިކުފާނާއި ނުގުޅުންތަކެއް އެބަހުރި ކަމަށެވެ. އޭގެ ތަފްސީލު ނުދެއްވިގެން އުޅުއްވަނީ މީޑިޔާގައި ވާހަކަ ދެއްކުމުގެ ހުއްދަ އެމަނިކުފާނަށް ނެތުމުން ކަމަށްވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، އެހެންކަމުން ޕީޕިއެމް/ޕީއެންސީގެ އާންމު މެމްބަރުންނާ ޕީއެންއެފްގެ އާންމު މެމްބަރުންނާ ދެމެދު އެއްވެސް ހިތް ހަމަ ނުޖެހުމެއް އޮވެގެންވާނެ ކަމަށް ދެކެވަޑައިނުގަންނަވާ ކަމަށެވެ.