ރާއްޖޭގެ ފަތުރުވެރުކަމާއި ވެހޭ ވަޒީރު އިބްރާހީމް ފައިސަލް އިންޑިޔާގައި، ރާއްޖޭގެ ޓުއަރިޒަމް ޕްރޮމޯޓް ކުރުމުގެ ނަމުގައި އަނެއްކާވެސް ރާއްޖެ ލަދުގަންނަވާލައިފިކަމަށް ޕީއެންއެފްގެ ސެކްރެޓަރީ މުހައްމަދު މަލީހް ޖަމާލް ވިދާޅުވެއްޖެއެވެ.

މީގެ ކުރިންވެސް މިނިސްޓަރ ފައިސަލްއަށް ވަނީ ބޭރުގެ މީޑިޔާތަކަށް "ބްރޯކެން އިންގްލިޝް" އިން ވާހަކަ ދައްކާ އިންޓަވިއު ދިނުމާއި ގުޅިގެން ގިނަ ބަޔެއްގެ ފާޑުކިޔުން އަމާޒުވެފައެވެ. މި ފާޑު ކިޔުންތަކާއިއެކު ޕަބްލިކް ސްޕީކިން ރަނގަޅުކުރުމަށް ކްލާސްތަކެއް ނަގާނެ ކަމަށް މިނިސްޓަރ ވަނީ ވިދާޅުވެފައެވެ.

މަލީހް އެކްސްގައި ކުރެއްވި ޕޯސްޓެއްގައި ފައިސަލް އަނެއްކާވެސް "ބްރޯކެން އިންގްޅިޝް"އިން ވާހަކަދައްކަވާ ވީޑިއޯއެއް ޝެއަރ ކުރައްވަމުން ވަނީ ކޯޗެއް ނަގައިގެން ކޯހުގެ ދެބައިކުޅަ އެއްބައި ނިންމަވާފައިވާތީ މަރުހަބާ ދަންނަވާފައެވެ.

މީގެ އިތުރުން 03 މަސް ފަހުން ސަރުކާރުގެ ކެބިނެޓް ސިންގަޕޯރ ކެބިނެޓަށްވުރެ ރަނގަޅުވާނެ ކަމަށް ބުނެ މަލީހްވަނީ ފާޑު ވިދާޅުވެފައެވެ.

މިނިސްޓަރެއްގެ ހުންނަން ޖެހޭ ކޮލިޓީއެއް ފައިސަލްގެ ކިބައިގައިނެތް ކަމަށާއި، ފައިސަލް ވަނީ ރާއްޖޭގެ ޓުއަރިޒަމްގެ ލެވެލް ބޭރު ދުނިޔޭގެ މާކެޓްތަކުގައި ވަރަށް ބޮޑަށް ދައްކޮށްލާފައިކަމަށް ބުނެ ގިނަ ފަރާތްތަކުން އަނެއްކާވެސް ސޯޝަލް މީޑިޔާގައި ޝުއޫރު ފާޅުކުރަމުންދާކަން ފާހަގަކުރެވެއެވެ.