ޓެރަރިޒަމްގެ މައްސަަލައެއްގައި ދައުވާކުރާ މީހުންގެ މެދުގައި ތަފާތުކުރާކަމުގެ މައްސަލައެއް ފެންމަތިވެއްޖެއެވެ.

ތޭރަ އޮންލައިނަށް މައުލޫމާތު ލިބިފައިވާ ގޮތުގައި ތަފާތުކުރުން ގެންގުޅެމުންދަނީ 2017 ވަނަ އަހަރުގެ އޭޕްރީލް މަހުގެ ތެރޭގައި މާލޭގައި ބޮން ގޮއްވަން އުޅުނު ކަމުގެ ތުހުމަތުގައި ދައުވާ އުފުލާފައިވާ މީހުންގެ މެދުގައެވެ.

އައިއީޑީއެއް ތައްޔާރު ކުރުމަށް ބޭނުންވާ ތަކެއްޗާއި ކެމިކަލް، ތަނެއްގެ ތެރޭގައި ތައްޔާރުކޮށް އައިއީޑީއެއް ހަދާ އެ ގޮއްވާލުމަށް ރާވަމުންދާކަމުގެ ތުހުމަތުގައި ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ އިއުތިސާމް މުޙައްމަދު ސައީދާއި، މުޙައްމަދު ތަސްލީމާއި، ނާސިއު މުޙައްމަދުގެ އިތުރުން، ޝިމާން ޝަރީފެވެ. އެ 4 މީހުންގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރަން އުޅުމުގެ ކުށުގެ ދައުވާއެވެ.

ދައުލަތުން ބުނާ ގޮތުގައި އެމީހުން ރާވަމުންދިޔައީ ޖޭޕީ އޮފީސް އިމާރަތް ހުންނަ މާފަންނު ކުނޫޒުގޭގައި ޖަލްސާއެއް ކުރިއަށް ދިޔަ ވަގުތު، އެތަނުގައި އައިއީޑީއެއް ގޮއްވާލުމަށެވެ.

ކުރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ. މި މައްސަލައިގައި އެންމެ ފަހުން އަޑު އެހުމެއް ބާއްވާފައިވަނީ ޝަރީއަތުގެ ކުރިން ހުށަހަޅާ ހުށަހެލުންތަކާމެދު ވާހަކަ ދެއްކުމަށެވެ. އެ އަޑު އެހުމުގައި އިއުތިސާމްގެ ވަކީލު އަހުމަދު ޔާމީނު ވަނީ މި މައްސަލައިގައި އިއުތިސާމު އެކަނި ޝަރީއަތް ނިމެންދެން ބަންދުގައި ބަހައްޓާތީ ކަންބޮޑުވުން ފާޅުކޮށްފައެވެ. އެގޮތުން ޔާމީން ވިދާޅުވީ، އޭނާ ބަންދުގައި ހުންނަނީ ވަރަށް ބޭއިންސާފު ގޮތަކަށް ކަމަށާއި، އޭނާ ބަންދުގައި ބަހައްޓާ މަސްލަހަތެއް ސާފު ކުރުމަށް ދިފާއުން ކުރި މަސައްކަތަށް އެކަށީގެންވާ ޖަވާބެއް ލިބިފައިނުވާ ކަމަށެވެ. ދިފާއީ ވަކީލު ވަނީ މިއީ އިންސާފުގެ ތަަރަހައިގެ ތެރެއިން އެއްމިން ކުރެވެން ޖެހޭ ކަމެއްކަން ފާހަގަ ކުރައްވާފައެވެ.

އިއުތިސާމުގެ އިތުރުން އިތުރު ތިން މީހެއްގެ މައްޗަށް އުފުލާ ދައުވައެއްގައި އިއުތިސާމްއަށް އެކަނި ވާނުވާ ބަންދު ޖަހާފައިވާތީ އޭނާގެ އާއިލާއިން ވެސް ވަނީ މިކަން ޕްރޮސެކިއުޓާ ޖެނެރަލް ހުސައިން ޝަމީމްއާ 2023 ވަކީލުއާ އެކު ބައްދަލުކޮށްފައެވެ. އެ ބައްދަލުވުމުގައި ބުނެފައިވަނީ ހަފްތާއެއް ތެރޭ ޖަވާބު ދޭނެ ކަމަށެވެ. ނަމަވެސް އެފަހުން ޝަމީމުއާ ބައްދަލުކުރަން ކުރި ހުރިހާ މަސައްކަތެއް ވަނީ ނާކާމިޔާބުވެފައިކަމަށް އާއިލާއިން މައުލޫމާތު ދިީފައިވެއެވެ.

މީގެ އިތުރުން މިއަހަރު ކުރީ ކޮޅުވެސް ޕީޖީއާ ބައްދަލުކުރަން އެދުމުން ޖަވާބެއް ނުދީ އެޕޮއިންޓްމަންޓް ވެސް ކެންސަލްކޮށްފައިވާ ކަމަށާ 2017 ވަނަ އަހަރު ހައްޔަރުކޮށް 2018 ވަނަ އަހަރު ބަންދުން ދޫކުރުމަށްފަހު އަނެއްކާވެސް 2021 ވަނަ އަހަރު އެހެން މައްސަލައެއްގައި ހައްޔަރުކޮށް ދައުވާ އުފުލާފައިވަނީ 2017 ވަނަ އަހަރުގެ މައްސަލައިގައި ކަމަށްވެސް މައުލޫމާތު ލިބިފައިވެއެވެ.

އިއުތިސާމު އަލުން ބަންދުކޮށްފައިވަނީ އެއްވެސް ޝަރުތަކާ ޚިލާފުވެގެނެއް ނޫންކަމަށާ އޭރު ޕީޖީގެ ފަރާތުން ދިފާއުގައި ވަނީ ބަންދު މުރާޖާ ކުރެވޭނެ ފުރުސަތު އޮތް ވާހަކަ ބުނެފައިކަން ވެސް ފާހަގަވެފައިވެއެވެ. 2021 ވަނަ އަހަރު ދައުވާ ކުރީ ތާކުންތާކު ނުޖެހޭ މައްސަލައެއްގައި ކަމަށާ އެ މައްސަލަ ވަނީ ސާބިތު ނުވާ ކަމަށް ނިންމާފައިކަމަށްވެސް ވަނީ މައުލޫމާތު ލިބިފައެވެ.

‏އެއާއެކު ބަންދު ކުރަން ޕީޖީ އިން ދެއްކި ހާލަތު ވަނީ ނެތި ގޮސްފައިކަމަށްވާއިރު އެ މައްސަލަ އިސްތިއުނާފުކޮށްފައެއްވެސް ނުވި ނަމަވެސް 2022 ވަނަ އަހަރު ފާސްކުރި ޓެރަރިޒަމް މަނާކުރާ ގާނޫނުގެ އިސްލާހާއެކު ދިފާއުއަށް ވަނީ ބަންދު މުރާޖާ ކުރުމުގެ ދޮރު ބަންދުކޮށް ހަމައެކަނި އެކަމަށް ހުށަހެޅޭނީ ޕީޖީއަށް ކަމަށް ބުނެފައެވެ.

އެހާ ހިސާބުން ޕީޖީން ވަނީ ބަންދު މުރާޖާ ކުރަން ދެކޮޅު ހަދާފައެވެ. މި މައްސަލައިގައި ދަޢުވާ ލިބޭ ހުރިހާ ފަރާތަކާ ދެކޮޅަށް ވެސް ހުރީ އެއް ހެއްކަކަށްވާއިރު ލޯޔަރު ޔާމީން މިއަދު ވިދާޅުވި ގޮތަށް މިއީ ޕްރޮސެކިއުޓާ ޖެނެރަލް އަދި ކޯޓުން ވަރަށް ބޭއިންސާފުން ކަންތައް ކުރާ ކޭސްއެއްގެ ގޮތުގައި ވަނީ ފާހަގަކުރެވިފައެވެ.

މައްސަލައަށް 8 އަހަރު ވާއިރު މައްސަލަ މިހާރު ބަލަމުންދަނީ 5 ވަނަ ގާޒީކަމާ މައްސަލައަށް ގިނަ އަހަރުތަކެއް ވެފައިވާއިރު މައްސަލަ ވަނީ އަލުން ފަށައި، ޕީޖީއަށް މައްސަލައިގައި ހެދުނު ގޯސްތައް ރަނގަޅު ކުރަން ފުރުސަތުދީ މުޅި މައްސަލައިގެ ލިޔެކިޔުންތައް ބަދަލުކޮށްފައިކަމަށްވާއިރު މައްސަލައިގެ އެންމެ އަސާސީ ދިފާއީ ހެކި ވަނީ ދުނިޔެ ދޫކޮށްފައެވެ.

އެހެންކަމުން ހަމައެކަނި އިއުތިސާމު ވާނުވާ ބަންދުގައި ނުވަތަ ޝަރީއަތް ނިމެންދެން ބަންދުގައި ބަހައްޓާ ސަބަބާ އަދި ތަފާތުކުރުން ގެންގުޅޭ ސަބަބާމެދު މިވަނީ ސުވާލު އުފައްދަން ޖެހިފައެވެ. ސެލެކްޓިވް ޕްރޮސެކިއުޝަނެއް މި ގައުމުގައި އޮތްކަމަށް މިހާރު ގިނަ ބަޔަކު ގަބޫލުކުރާއިރު ދައުލަތުން އެއް މައްސަަލައެއްގައި ޚަސްމުންނާ މެދު ތަފާތުކުރުން ގެންގުޅެނީ ކީއްވެކަމާ މެދު މައުލޫމާތު އޮޅުން ފިލުވުމަށް ޕީޖީ އޮފީހުގެ ބަހެއް ހޯދާލަން ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.

ވާނުވާ ބަންދު އުވާލުމަކީ ރައީސް މުހައްމަދުގެ ރިޔާސީ ވައުދެއް ނަމަވެސް މި ސަރުކާރުން އަދި އެކަމުގައި އެއްވެސް މަސައްކަތެއް ފަށާފައިވާކަމުގެ މައުލޫމާތު ހިއްސާކޮށްފައިނުވެއެވެ.