ފާޑުކިޔުންތައް އަމާޒުވުމުން ރައީސް އޮފީހުން އައިކޮމްގެ އަޑުއެހުންތަކުގައި ބައިވެރިވާން ފަށައިފިއެވެ.

ރައީސް އޮފީހަށް ހުށަހަޅާ އާރޓިއައިތަކުގެ ޖަވާބު ނުދީ ހިފަހައްޓާ މައްސަލައިގައި އެކި ފަރާތްތަކުން ވަނީ އެ އޮފީހާ ދެކޮޅަށް އައިކޮމްއަށް މައްސަލަ ހުށަހަޅާފައެވެ.

އެގޮތުން މިއަދުވެސް އައިކޮމްއިން ވަނީ އަޑުއެހުމެއް ބާއްވާފައެވެ. އެ އަޑުއެހުމަށް ރައީސް އޮފީހުން ހާޒިރުވެފައިވެއެވެ. މިއީ އައިކޮމްގެ އަޑުއެހުމެއްގައި ރައީސް އޮފީހުން، މިދިޔަ އަހަރުން ފެށިގެން ބައިވެރިވި ފުރަތަމަ ފަހަރެވެ.

މިއަދު ބޭއްވީ ރައީސްގެ ދެކަނބަލުންނާއި ސަރުކާރުގެ އިސްވެރިން ޗައިނާއަށް ކުރެއްވި ދަތުރުގައި ބައިވެރިވި ފަރާތްތަކުގެ ތަފުސީލު ހޯދުމަށް އެދި އަމިއްލަ ފަރާތަކުން ހުށަހެޅުމުން ރައީސް އޮފީހުން އެއްބައި މައުލޫމާތު ނުދިން މައްސަލައެއްގެ އަޑުއެހުމެކެވެ.

މި އަޑުއެހުމުގައި ވާހަކަދައްކަވަމުން އިންފޮމޭޝަން ކޮމިޝަނަރު އާހިދު ރަޝީދު ވަނީ ވޭތުވެދިޔަ މުއްދަތުގައި ރައީސް އޮފީހުން ގިނަ ޖަވާބުތައް ނުދޭ ކަމާއި އަޑުއެހުންތަކަށް ހާޒިރުނުވާކަން ފާހަގަކުރައްވާފައެވެ. ނަމަވެސް މިދިޔަ މަހުގެ ފަހުކޮޅު ކުއްލިއަކަށް ޖަވާބުތައް ދީފައިވާކަން ވެސް އޭނާ ފާހަގަކުރެއްވިއެވެ.

އާހިދުގެ ސުވާލަށް ދެއްވި ޖަވާބުގައި ރައީސް އޮފީހުގެ އިންފޮމޭޝަން އޮފިސަރު އައިޝަތު އަގީދާ ހަސަން ވިދާޅުވީ، އެ ކޮމިޝަނަށް ހުށަހެޅޭ ރިކުއެސްޓުތަކަށް މިހާރު ޖަވާބު ދެމުންދާ ކަމަށާއި ކުރިއަށް އޮތް ތަނުގައި އެ އޮފީހުގެ ވިސްނުމަކީ ގާނޫނުގައިވާ މުއްދަތުގައި ޖަވާބު ދިނުން ކަމަށެވެ.

އާރުޓީއައިތަކަށް ޖަވާބު ނުދީ ސަރުކާރުން ހިފަހައްޓަމުންދާއިރު، މިހާރު ވެސް އެ އޮފީހަށް އަންގާފައިވާ އެންގުންތަކަށް ޖަވާބު ނުދީ އެބަހުއްޓެވެ. އޭގެ ތެރޭގައި ސިޔާސީ މަގާމުތަކުގެ އަދަދު ހިމެނެ އެވެ.

މިފަހުން އައިކޮމްއިން އާންމުކުރި ތަފާސްހިސާބުތަކަކުން އެނގުނު ގޮތުގައި، މައުލޫމާތަށް އެދި ހުށަހަޅާ އާރުޓީއައިތަކަށް ޖަވާބު ނުދީގެން އެންމެ ގިނަ މައްސަލަތައް ހުށަހެޅީ ވެސް އެ އޮފީހާ ދެކޮޅަށެވެ.

ރައީސް އޮފީހަށް ހުށަހެޅި އާރުޓީއައިތަކަށް ގާނޫނު ބުނާ މުއްދަތު ހަމަވިއިރުވެސް ޖަވާބުނުދީ ތިބުމަށް ފަހު އެ އާރުޓީއައި ތަކަށް ރައިސް އޮފީހުން ޖަވާބުދީފައިވަނީ މިނިވަން ދުވަހުގެ ރައީސްގެ ތަގުރީރާ ދިމާކޮށް ޖުލައި 25 ވަނަ ދުވަހުގެރޭގެ ދަންވަރުގެ ވަގުތުގައެވެ.