ސަހްޔޫނީންގެ ޕާސްޕޯޓު މަނާކުރުމަށް ދިވެހި ރައްޔިތުން ގޮވަމުންދާއިރުވެސް އެކަން ދިގު ދެންމުމގެ ނިޔަތުގައި މި ސަރުކާރުން ކޮމިޓީ މަރުހަލާއަށް ފޮނުވާ 56 ދުވަސް ފާއިތުވިއިރުވެސް އަދިވެސް އެކަމަށް އަމަލީ ސިފައެއް ގެނެސްފައިނުވާކަން ވަނީ ހާމަވެފައެވެ.

ސަޙްޔޫނީންގެ ޕާސްޕޯޓު މަނާކޮށް އެމީހުންނަށް ރާއްޖެ އެތެރެ ވިޔަ ނުދިނުމަށް ގޮވާލާ ދިވެހި ރައްޔިތުން ރައީސް އޮފީސް ދޮށަށް އެއްވުމުން، މިއީ ދިވެހިންގެ އަޑު އެންމެ ގާތުން އެންމެ އަވަހަށް އަޑު އަހާ ސަރުކާރުގެ ގޮތުގައި ދެއްކުމަށް ހަމަ އެދުވަހު ކެބިނެޓުގައި އެކަމާ މަސްވަރާކޮށް ނޫސްވެރިންގެ ބައްދަލުވުމެއްވެސް ބޭއްވިއެވެ. އަދި އެމައްސަލަ އަނބުރާ މަޖިލީހަށް ފޮނުވާލަން ނިންމާފައިވާ ކަމަށް ބުނެފައެވެ.

ނަމަވެސް އެއީ ކުރިން ވެސް މަޖިލީހުން ގޮތް ނިންމާ ރައީސް އޮފީހަށް ފޮނުވާފައިވާ ބިލެއްކަން ފާހަގަކޮށްލެވެއެވެ. އެހެންކަމުން އަނބުރާ މަޖިލީހަށް އެ ބިލު ފޮނުވާލީ ދިގު މަގު ޚިޔާރުކޮށް އެކަން ކުރުން ފަސްކުރުމުގެ ނިޔަތުގައިކަން ހާމަވެއެވެ.

އޭގެ ފަހުން ވެސް މިހާރު 56 ދުވަސް ފާއިތުވެފައިވާއިރު އަދިވެސް ސަހްޔޫނީންގެ ޕާސްޕޯޓާ ގުޅޭ މައްސަލައިގައި ވެރިކަން ކުރާ ޕީއެންސީގެ ސުޕަރ ސުޕަރ މެޖޯރިޓީ އޮތް މަޖިލީހުން ގޮތެއް ނިންމާފައިނުވެއެވެ.

މައުލޫމާތު ލިބިފައިވާ ގޮތުގައި އެމެރިކާގެ ޕްރެޝަރ ބޮޑުވެ އެކަންކުރަން ސަރުކާރުން ގެންދަނީ ފަހަތު ފަޔަށް ބުރަވަމުންނެވެ. އެގޮތުން ދާދި ފަހުން ޚާރިޖީ ވަޒީރު މޫސާ ޒަމީރު އެމެރިކާއަށް ކުރެއްވި ދަތުރުފުޅުގައި، އެކަން ނުކުރާނެކަމަށް ވިދާޅުވެ އެމެރިކާއިން ފައިސާ ނަގާފައިވާކަމުގެ އަޑުތައްވެސް ފެތުރިފައިވެއެވެ.

އެހެންކަމުން ސަޙްޔޫނީންގެ ޕާސްޕޯޓު މަނާކުރާނެ ކަމަށް ބުނެ ދަޅަތައް ދައްކާ، ސަރުކާރުން ގެންދަނީ ދިވެހި ރައްޔިތުންނަށް އޮޅުވާލަމުންކަން ފާހަގަކޮށްލެވެއެވެ.