ސަރުކާރުން މިވީ 9 މަސް ދުވަސް ތެރޭ ކުރި އެތައް ކަމެއްގެ ސަބަބުން ރައްޔިތުން ކަންބޮޑުވެ މުޒާހަރާތައް ކުރަން ފަށައިފި ކަމަށް ރައީސް ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައި ވަނީ ޕީއެންއެފްގެ ފަރާތުން ހޯމަ ދުވަހުގެ ރޭ ފްރޮންޓް އޮފީހުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެގޮތުން އެމަނިކުފާނު ވިދާޅުވީ ސަރުކާރުން މިވީ 9 މަސްތެރޭ ވަރަށް ކަންކަންކޮށްފި ކަމަށެވެ. ނަމަވެސް އެ ކުރި ކަންކަމުގެ ސަބަބުން މިއަދު އެކި އެކި ފަރާތްތަކުން އަންނަނީ ސަރުކާރާ ދެކޮޅަށް ނިކުމެ މުޒާހަރާތައް ކުރަމުން ކަމަށް ވެސް އެމަނިކުފާނު ވިދާޅުވިއެވެ.

ސަރުކާރުން ކަންކަން ހައްލު ކުރުމަށް ސަރުކާރާ އެކު ވާހަކަދައްކަން ބުނާއިރު މުޒާހަރާތަކަށް ނިކުމެ ހިޔާލު ފާޅުކޮށް ކަންބޮޑުން ފާޅުކުރާ ފަރާތްތަކަށް ފުލުހުން މެދުވެރިކޮށް ސަރުކާރުން ހުރަސް އަޅަމުންގެންދާ ކަމަށް ވިދާޅުވެ ރައީސް ޔާމީން ވަނީ ސަރުކާރަށް ފާޑު ވިދާޅުވެފައެވެ.

އެގޮތުން އެމަނިކުފާނު ވަނީ މަސްވެރިންނަށް ފައިސާ ނުލިބިގެން ކުރި މުޒާހަރާޔާއި ވެހިކަލްތައް ޓޯ ކުރުމުން ޒުވާނުން ނިކުމެ ކުރި މުޒާހަރާގެ ވާހަކަ ވެސް ފާހަކުރައްވާފައެވެ.

އިތުރަށް ރައީސް ޔާމީން ވިދާޅުވީ މިހާރު ކޮންމެ މުޒާހަރާއަކަށް 300 އެއްހާ މީހުން ނުނިކުތަސް މުޒާހަރާ ވާނީ މުޒާހަރާއަށް ކަމަށެވެ.