ނިމިދިޔަ ރިޔާސީ އިންތިޚާބުގެ ކެމްޕޭން ދުވަސްވަރު ފޯރީގައި ވައުދުތަކުގެ ވާހަކަ ބަޔަކު މީހުން ދެއްކެވިއެވެ. އާދެ މި ދައްކަނީ އޭރުގެ އިދިކޮޅު ކެންޑިޑޭޓް އަދި މިހާރުގެ ރައީސުލްޖުމްހޫރިއްޔާގެ ވާހަކައެވެ. އޭރު އެމަނިކުފާނުގެ ވާހަކަ ވަރަށް ސާފެވެ. އެއްވެސް ހާސްކަމެއްނެތް ކަމަށް ވިދާޅުވީ މޫނަށް ރުލެއްވެސް އަރުވާނުލައްވައެވެ. ދައުލަތުގެ ރިޒާވް ކޮންމެ ހާލަތެއްގައި އޮތަސް ފަރުވާލެއް ނެތްކަމަށް ބިރެއް ޖެހިލުންވުމެއް ނެތްކަމަށް ވިދާޅުވިއެވެ.

ރައީސް އިބްެރާހިމް މުހައްމަދު ޞާލިހްގެ ސަރުކާރުގެ މާލީހާލަތު ރަނގަޅަށް އެނގިވަޑައިގެން ހުންނަވާ ކަމަށާއި ފައިސާ ނެތަސް ފައިސާ ލިބެންހުރި ކޮޅުތަކާއެކުގައި 'ގްރީން ސިގްނަލެއް" ލިބިފައިވާ ކަމަށް ވެސް ވިދާޅުވިއެވެ.

އިންތިޚާބް ކާމިޔާބު ކުރުމަށްފަހު ފުރަތަމަ ފެއްޓެވީ ހުވާ ކުރެއްވުމުގެ ރަސްމިއްޔާތުގެ ކަންކަމެވެ. މިލިއަނުން މިލިއަނުން ހަރަދުކޮށް މިހާތަނަށް ބޭއްވި އެންމެ އަގުބޮޑު ހުވާ ކުރުމުގެ ރަސްމިއްޔާތުގެ ރެކޯޑެއް ހެދީ ކޮން ގައުމެއްގެ ވެރިޔަކަށް އައިޑީޔާ ދިނުމުގެ ބޭނުމުގައި ކަމެއް ނޭނގެއެވެ.

ހުވާ ކުރެއްވުމަށްފަހު ދެން މިސްރާބު ޖެއްސެވީ ދިރިއުޅުއްވަން މުލިއާގެ ތައްޔާރު ކުރުމަށެވެ. ހަމައެގޮތައް ހިލާލީގެއަށްވެސް ގެނައި ބަދަލުތަކުގެ އަދަދު މިލިއަނުން ގުނާ ލެވެޔޭ ބުންޏަސް ދޮގަކަށްވެ ނުދާނެެއެވެ.

މިހާތަނަށް ރެކޯޑް އަދަދަކަށް ސިޔާސީ މަގާމްތައް އުފެއްދުމުގެ އިތުރުން އެހެނިހެން ޚަރަދުތައް ކުރުމުގައި މި ސަރުކާރުން ދައުލަތުގެ މާލިއްޔަތަކަށް ބަލައި ނުލައެވެ. ދައުލަތުގެ ފައިސާ ހަމަ ތަޅާ ބޭލީއެވެ. އެހެންތާ ވާނީ ބޭރުގެ ގައުމުތަކުން ގްރީން ސިގްނަލް ލިބިފައިވާ ވަރުން ފަހަކަށް އެއްވެސް ވަރަކަށް ވިސްނާ ނުލީއެވެ.

ރޭކާލީ އޭގެ މާފަހުންނެވެ. ވެރިކަމުގެ މާމުއި ހަނދުގެ ދުވަސްވަރު ނުވެސް ނިމެނީހެވެ. ފައިސާ ދޭނެ ކަމަށް ހީކުރެވުނު ފަރާތްތަކުން ހަތަރު އަނާވެސް ދިއްކޮށް ނުލީމައެވެ. އެފަރާތްތަކުގައި ޖެހި ސަލާމަށް ނާށިގަނޑަށް އެއްޗެއް ވައްޓާލާނެ ބަޔަކު ނުވީމައެވެ.

ވެރިކަމުގެ މާމުއި ހަނދުގެ ދުވަސްވަރު ރިޒާވުން އަޗާތަޅާލާފައި ހިތި ބޭސް ބޯންޖެހިދާނޭ ކިޔުމުގެ ބޭނުމެއް ނެތެވެ. ބަތާ ގަރުދިޔަ ކައިގެންވެސް ރައްޔިތުން ތިބީ ތިޔަ ގޮވާހާ ގޮވެލިފަތި ގަބޫލު ކުރާކަށެއް ނޫނެވެ. ކުރިން ބުނި އެތި ކެންސަލް ކުރެވޭނީ ވަކި ވަރަކަށެވެ. މި ސަރުކަރުން ފެންނަނީ މާ ގިނައިން ކެންސަލްކޮށްލާ މަންޒަރެވެ. އެހެން އުޅެނިކޮށް ދެން ފެންނާނީ ރައީސް މުއިއްޒު ދެވަނަ ދައުރަކަށް ތެޔޮ ލައިގެން ހުންނަވަނިކޮށް، ރައްޔިތުން ނިކުމެ ދެވަނަ ދައުރު ކެންސަލްކޮށްލާނެ މަންޒަރު ނޫންކަމެއް ވެސް ނޭނގެއެވެ.