ކަންކަމުންގައި ތިމާމެމެންގެ އަމިއްލަ އިއުތިރާފަށްވުރެ މޮޅު އިތުރު ހެއްކެއް ނޯންނާނެކަން ޔަގީނެވެ. ދައްކަން މިއުޅޭ ވާހަކައަކީ އެއް ޒަމާނެއްގައި އުޅުނު މާ އިޚްލާސްތެރިންތަކެއް ވާހަކައެވެ.

އާދޭހެވެ. އިޚްލާސްތެރިކަމަށް ދެއްކިގެން އުޅުނު ގަބީލާއެއްގެ ބަޔެކެވެ. އެ ގަބީލާގެ ވެރިމީހާ ނަގާ ނުހައްގުން ޖަލަށްލުމާއެކު ދަށުން ހުރި މީހާއަށް އީދެއް އައިކަހަލައެވެ. އެއާއެކު ހިތާދޫ މީހަކަށް ހުދު ފޮށާއެއް ލިބުމުން ވާނެ ހައެތިވާން ފެށިއެވެ. ގަބީލާގެ ވެރިކަން ހިތަކަށް ލިބި މުޅި ގަބީލާ ތެރެ ފަސާދަ ކުރަން ފެށިއެވެ. އޭރުވެ ގަބީލާގެ މެދު ފަންތީގެ މީހުން އެވާހަކަ ދައްކައެވެ. ނަމަވެސް ވެރިމީހާއާ ހަމައަށް އެ ވާހަކަތައް ފޯރުކޮށްދޭނެ ގޮތެއް ނެތި މެދު ފަންތީގެ މީހުން ތިބީ އެ ދުވަސްވަރު ގައުމަށް ޖެހިފައި އޮތް ރީނދޫ ހުމުގެ އަސަރުން ގައުމު ސަލާމަތްކުރުމުގެ ނިޔަތާ އެކު ކަމަށްވުމުން ގަބީލާގެ ފައިސާއިން ރަސްކަން ކުރަމުން ދިޔަ ހިޔަޅުންގެ އަމަލުތަކަށް ފާރަވެރިވަމުން އެ މަސައްކަތް ކުރިއަށް ގެންދިޔައެވެ.

ގަބީލާގެ ވެރިމީހާއަށް ގައުމުގެ ވެރިކަން ހޯދައިދިނުމަށް ކުރެވެން ހުރި ހުރިހާ މަސައްކަތެއް ކުރަމުން އެ މެދު ފަންތީގެ މީހުން ކުރަމުން ދިޔައެވެ. ނަމަވެސް އެއްކަލަ ހިޔަޅު މީހުން ގެންދިޔައީ ސިއްރުން ރޭވުންތައް ރާވަމުންނެވެ. ގަބީލާގެ ވެރިމީހާ ވެރިކަމަށް ގެންނަން ބޭނުންނުވެ ހިންގީ ޖަރީމާއެވެ. އަނިޔާ ދިނުމުގައި ބައިވެރިންގެ ގޮތުގައި ފިނި ކޮޓަރީގައި ތިބެ ތަތްގަޑާ އެއްޗެހި ވަގަށް ނަގައިގެން މާކުރިން ރޭވުންތައް ރާވައިގެން ފޯމާ އެއްޗެއްހި ވެއްދި ވާހަކަ ދެއްކީވެސް އަމިއްލަ އިއުތިރާފުންނެވެ.

އޭގެ ފަހުން ކަމަކަށް ފަހު ކަމަކަށް އަމިއްލަ އިއުތިރާފުވަމުން ގެންދަނީއެވެ. ރެޔަކީވެސް އެކަހަލަ ރެއެކެވެ. ޕީއެންސީއޭ ކިޔުނު ގަބީލާގެ ހައުސްގައި ބޭއްވި ސައްލާގައި ވާހަކަ ދައްކަމުން އެއްކަލަ ހިޔަޅު ވިސްނުމުގެ އަދުރޭ ވަނީ އޭނާ ރައީސް އަބްދުﷲ ޔާމީންއާ މެދު ނަފްރަތު އޮތް މިންވަރު ހާމަކޮށްދިފައެވެ.

އެގޮތުން އޭނާ ރައީސް ޔާމީންގެ ކިބައިން ހިފަމުންދަނީ ބަދަލު ހިފުމެއްކަން ނިކަން ރަގަޅަށް ރޭގެ ވާހަކަތަކުން ސާފުވެގެން ދިޔައެވެ. 30 އަހަރުވީ ސިޔާސީ ހަޔާތުގައި އޭނާއަށް ނުލިބުނު ކާމިޔާބީތަކުގެ ޒިންމާ ރައީސް ޔާމީންގެ އިސްތަށިފުޅުގައި އަޅުވަމުން އޭނާ މިއަދު އެ ހިފަނީ ބަދަލު ހިފުމެއްކަން ނިކަން ރަގަޅަށް ހާމަވިއެވެ.

18 ވަނަ ރައްޔިތުންގެ މަޖިލީހުގެ ނައިބު ރައީސްކަން ވެސް ނުލިބުނު ހިސާބުން އޭނާގެ ހިތުގައި ރައީސް ޔާމީންއާ މެދު އޮތް ނުތަވަސްކަން ރޭގައި ޕޯޑިއަމުގައި އަތް ޖަހަމުން ދައްކަމުން ދިޔަ ވާހަކަތަކުން ނިކަން ރަގަޅަށް ހާމަވިއެވެ.

ރައީސް ޔާމީންއަކީ އޭނާގެ ސިޔާސީ ހަޔާތަށް އެޅިފައިވާ ކަޅު ވިލާގަނޑެއްގެ ގޮތުގައި ރޭ އަބްދުރޭގެ ވާހަކަތަކުން ސިފަވެގެންދިޔައެވެ. އެހެންކަމުން އެ ފުސް ވިލާގަނޑު ކަހާލަން އޭނާ ބޭނުންވެފައި ހުންނަތާ ނުހަނު ދުވަސްވެއްޖެކަން ވެސް ހާމަވެފައިވެއެވެ. އެ ފުރުސަތު އަދުރޭއަށް ލިބުނީ ރައީސް ޔާމީން ނުހައްގުން ޖަލަށް ލުމާ އެކުއެވެ. ޕީޕީއެމް ޕީއެންސީ އަދުރޭއަށް ހިތަކަށް ލިބި ޕާޓީގެ ފައިސާއިން އަމިއްލަ ކަންކަން ކުރަމުން ހިތްހަމަ ޖެހުމަށް ޖާރިޔާއިން ގޮވައިގެން ހުޅުމާލޭގެ ގެސްޓު ހައުސްތަކުން ދުވީ ތިޔަހެން ބަލާފައެއް ނޫނެވެ.

ރިޔާސީ އިންތިހާބަށް ވަގުތު ގަތްވީވީހެން ފަނޑިޔާރުންނާ ބައްދަލުކުރުމާ ފޯނހުކުރުން އިތުރުކުރިއެވެ. ރައީސް ޔާމީން މިނިވަން ކުރުމުގެ ނަމުގައެވެ. ނަމަވެސް ދެމުން ދިޔައީ ރައީސް ޔާމީންގެ ހުކުމް ދަމަހައްޓަން ރިޝްވަތެވެ.

މިހުރިހާ ކަމެއް ހިނގާ ވެރިކަން ވެސް ބަދަލުވީ ފަހުން މަޑު މަޑުން އަދުރޭގެ އަނގައިން މިދަނީ ހަގީގަތް ހާމަކުރަމުންނެވެ. ﷲގެ ކުލަދުންވަންތަކަން ނިކަން ދެކިބަލާށެވެ. ރައީސް ޔާމީން ޖަލުަގއި ގަސްތުގައި ރާވައިގެން ބޭއްވީ ވެސް ރައީސް މުއިއްޒުކަން އަދުރޭގެ އިއުތިރާފުން ރައްޔިތުންނަށް ހާމަވެއްޖެއެވެ.

ނުކިޔަވާ ހުއްޓަސް މިއަދު ތިމަންނާއަކީ މަޖިލީހުގެ ރައީސޭ ބުނަމުންދާއިރު މީގެ ކުރިން ނުކިޔާ އިބޫ ކީ މީހުން މިއަދު ކޮބައިތޯއެވެ؟ ރައީސް ނަޝީދުއަށް ރައީސް އިބޫ ލަގާ ދިން ވާހަކަ ގޮވިމީހުން މިއަދު ރައީސް ޔާމީނަށް ވެސް އެދަނީ ހަމަ އެ ލަގާ ދެމުންނެވެ. ކަންކަމުގައި ފެންނަމުން މިދަނީ އަދުރޭ އަމިއްލަ އިއުތިރާފުވަމުން އަންނަ މަންޒަރެވެ. މިޔަށް ބުޅާ ގޯނިން ބޭރުވުމޭ ވެސް ކިޔާއުޅެއެވެ.