ކިންގްސްޓަން ހޯލްޑިންގްސް މޯލްޑިވްސް ޕްރައިވެޓް ލިމިޓެޑްއިން ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނަގާފައިވާ މައްސަލައިގައި ގެއްލުން ލިބުނު މީހުން ފުލުހުންނަށް އަންގަން އެދިއްޖެއެވެ.
ދިވެހި ފުލުހުންގެ ހިދުމަތުން ބުނި ގޮތުގައި އެ ކުންފުނިން އާންމުންނަށް ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނަގާފައިވާ ކަމަށް ތުހުމަތު ކުރެވޭ މައްސަލަތަކެއް ހުށަހަޅާފައި ވާތީ އެ މައްސަލަތައް މިހާރު ތަހުގީގު ކުރަމުންދާ ކަމަށެވެ.
އެހެންކަމުން، ކިންގްސްޓަންއިން ސައިކަލު ގަތުމުގައި މަކަރާއި ހީލަތުގެ އަމަލެއްގެ ޝިކާރައަކަށް ވެފައިވާ އިތުރު އެއްވެސް މީހަކު ހުރި ނަމަ، ފުލުހުންގެ އިކޮނޮމިކް ކްރައިމް އިންވެސްޓިގޭޝަންގެ ނަންބަރު 9790048 އަށް ގުޅައި އެ މައުލޫމާތު ހިއްސާކުރުމަށް ފުލުހުން ވަނީ އެދިފައެވެ.
އެ ކުންފުނީގެ މައްސަލަ ފުލުހުން ބަލަން ފަށާފައި މިވަނީ އެ ތަނުން ސައިކަލު ގަންނަން ފައިސާ ދައްކާފައިވާ އެތައް ބަޔަކު ކުންފުނީގެ ޝޯ ރޫމް ހުންނަ ސަރަހައްދަށް ގޮސް އެކަމާ އަޑުއުފުލާފައި ވަނިކޮށެވެ.
