ދިވެހި ރައްޔިތުން ތިބީ ރައީސް ޑރ މުހައްމަދު މުއިއްޒު ވެރިކަމަށް އައުމުގެ ކުރިން ނެރުއްވި މެނިފެސްޓޯ، ވެރިކަމުގައި ކިހާ ވަރަކަށް ތަންފީޒު ކުރޭތޯ ބަލަންކަމަށް ރައީސް އަބްދުﷲ ޔާމީން އަބްުދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައި ވަނީ ޕީއެންއެފް އިން ދަ ފްރޮންޓް އޮފީހުގައި ބުރާސްފަތި ދުވަހުގެ ރޭ ކުރިޔަށް ގެންދިޔަ ޖަލްސާގައި ކުރީގެ ކޮމިޝަނަރ އޮފް ޕޮލިސް ހުސައިން ވަހީދަށް ކުރެއްވި ސުވާލުގެ ތެރެއިންނެވެ.

އެގޮތުން ރައީސް ޔާމީން ވިދާޅުވީ ރިޔާސީ އިންތިޚާބާ ދިމާކޮށް އަހުދުތަކެއް އެކުލަވާލައިގެން ނެރެނީ މެނިފެސްޓޯ އެއް ކަމަށެވެ. ރައްޔިތުންނާއެކު ވެވޭ ސޯޝަލް ކޮންޓްރެކްޓިން ފެނިގެން ދަނީ ވެސް ރިޔާސީ ކެންޑިޑޭޓްގެ މެނިފެސްޓޯގެ ސިފައިގައި ކަމަށާއި އަދުގެ ރައީސް ޑރ މުހައެްމަދު މުއިއްޒު ވެސް މެނިފެސްޓޯ އެއް ނެރުއްވި ކަމަށް އެމަނިކުފާނު ވިދާޅުވިއެވެ.

ރައީސް މުއިއްޒު ހިފައިގެން އައި މެނިފެސްޓޯ ކިހާ ވަރަކަށް ތަންފީޒު ކުރޭތޯ ރައްޔިތުން ތިބީ ބަލަން ކަމަށް ވިދާޅުވެ ރައީސް ޔާމީން ވަނީ ސަރުކާރުން މެނިފެސްޓޯގެ އިތުރުން ވައުދު ފޮތެއް ވެސް އެކުލަވާލާ އޭގައި ވެސް އެތައް ވައުދުތަކެއް ހިމަނުއްވާފައި ވާކަމަށް ވިދާޅުވެފައެވެ.

އޭގެއިތުރުުން ރައީސް ޔާމީން ވިދާޅުވީ ކުރީގެ ރައީސް ޞާލިހްގެ ވެރިކަމުގައި އަޑުއިވިގެން ދިޔައީ ވެރިކަމުގެ އަހަރެއްހާ ދުވަހުގެ ތެރޭ ހިފައިގެން އައި މެނިފެސްޓޯ ތަންފީޒުކޮށް ނިމުނު ވާހަކަ ކަމަށާއި ނަމަވެސް މެނިފެސްޓޯ އަކީ ވެރިކަމުގެ 5 އަހަރަށް ބަހާލާއިގެން ހަދާފައިވާ އެއްޗެއް ކަމުން އެހާ އަވަހަށް މެނިފެސްޓޯ ތަންފީޒުކޮށް ނިންމާ ނުލެވޭނެކަމަށް ވެސް އެމަނިކުފާނު ވިދާޅުވިއެވެ.

ރައީސް މުއިއްޒުގެ މެނިފެސްޓޯގައި ވަރަށް މުހިންމު ވަރަށް ބައިވަރު ދާއިރާތަކެއް ފާހަގަކުރައްވާފައިވީ ކަމަށާއި އެ ދާއިރާ ތަކަކީ އިގްތިޞާދީ ދާއިރާގެ ވާހަކަޔާއި އަދި ހާއްސަކޮށް މަސްވެރިކަމުގެ ދާއިރާގެ ވާހަކަ ވެސް ފާހަގަކުރައްވާފައި ހުރި ކަމަށް ރައީސް ޔާމީން ވިދާޅުވި އެވެ.

ނަމަވެސް ވެރިކަމަށް 9 މަސް ވެގެން ދިޔަ އިރު މެނިފެސްޓޯގައި ފާހަގަކޮށްފައި މިވާ މުހިންމު އެއްވެސް ދާއިރާއެއްގެ ކަމެއް ތަންފީޒުކޮށްފައި ނުވާތީވެ ރައީސް ޔާމީން ވަނީ ރައީސް މުއިއްްޒަށް ފާޑުވިދާޅުވެފައެވެ.