ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ) ޖުމްހޫރީ ޕާޓީ (ޖޭޕީ)ގެ ލީޑަރު މާމިގިލި ދާއިރާގެ މެމްބަރ ގާސިމް އިބްރާހިމާއި ބައްދަލު ކުރެއްވުމަށް އދ. މާމިގިއްޔަ ވަޑައިގަތުމުން ރަތްދޫލައިގެ މަރުހަބާ ދަންނަވައިފި އެވެ.
ގާސިމްގެ ދައުވަތަކަށް އަދުރޭ މާމިގިއްޔަށް ވަޑައިގެންނެވީ ގާސިމްގެ ކުންފުނި ވިލާގެ ފްލައިމީގެ މަތިންދާބޯއްގައެވެ.
ގާސިމަކީ އަމިއްލަ އެދުމުން ފޯވެފައި ހުރި މީހެކޭ ކިޔައި އިދިކޮޅުގައި އޮވެ އެންމެ އަޑު ގަދަ ކުރި އެކަކަކީ އަދުރޭއެވެ.
އެގޮތުން އަދުރޭ އޭރު ވިދާޅުވީ ކަނޑު ވިއްކާލުމާއި ދެކޮޅަށް އޭރުގެ އިދިކޮޅު ފަރާތްތަކުން ހުކުރު ދުވަހު ބޭއްވި އެއްވުމުގައި ބައިވެރި ނުވާން ޖުމްހޫރީ ޕާޓީގެ މެމްބަރުންނަށް ގާސިމް ގޮވާލެއްވުމުން ގާސިމަކީ ގައުމުގެ ހައްގުގައި މަސައްކަތް ކުރާ ލީޑަރެއް ނޫންކަމަށެވެ.
ނަމަވެސް މިއަދު ގާސިމަކީ ހުދު ކާފޫރު ކޮޅަކަށް ވެއްޖެއެވެ. އަދުރޭ އާއި ގާސިމް އަންނަނީ ގުޅުން ބަދަހިކޮށް އަމިއްލަ ވިޔަފާރިތައް ކުރި އެރުމަށް މަޝްވަރާ ވެސް ކުރަމުންނެވެ.
