ރައްޔިތުން މަޖިލީހުގެ ރައީސް އަދި ވެރިކަންކުރާ ޕީއެންސީގެ ޗެއާޕާސަން އަބްދުއްރަހީމް އަބްދުﷲ (އަދުރޭ) ދައްކަވާ ވާހަކަތަކުން ފެންނަނީ މިހާރުގެ ރައީސް މުހަައްމަދު މުއިއްޒުގެ އަހުލާގު ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ ފްރޮންޓް އޮފީހުގައި ބުރާސްފަތި ދުވަހުގެ ރޭ އޮތް ޖަލްސާގައި ވާހަކަ ދައްކަވަމުންނެވެ.

އެގޮތުން އެމަނިކުފާނު ވިދާޅުވީ އަބްދުއްރަހީމަކީ މިހާރުގެ ރައީސް މުއިއްޒުގެ ރޯލް މޮޑެލް ކަމަށް ހުދު އެ މަނިކުފާނު ވިދާޅުވެފައިވާ ކަމަށެވެ. އެހެން ކަމުން ފެނިގެން އެ ދަނީ ރައީސް މުއިއްޒުގެ އަހުލާގު ކަމަށް ވެސް ރައީސް ޔާމީން ވިދާޅުވި އެވެ.

ކޮންމެ ވާހަކައެއް ބުނެފައި އެ ވާހަކައަށް އެ މަނިކުފާނު އެއްޗެއް ވިދާޅުވުމުން "ބަށި ކުޅޭހެން ޗުކީ ބުނެފައި ރެކެނީ" ކަމަށް ވެސް ރައީސް ޔާމީން ވިދާޅުވި އެވެ. މައްސަލައަކަށް ވާކަމަކީ އެއީ ކަމަށާއި ސަރުކާރަށް ފާޑުކިޔަނީ ޒާތީ ވެގެން ނޫން ކަމަށް ވެސް ރައީސް ޔާމީން ވިދާޅުވި އެވެ.