ރައީސް މުހައްމަދު މުއިއްޒު ރާގު ބަދަލުކުރައްވާ ވެވަޑައިގަންނަވަމުން ގެންދަވާ ޣައްދާރުވުމަށް ވުރެ ބޮޑު ޣައްދާރުވުމެއް ގައުމަށް ނޯންނާނެ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ. ޖަމީލު، އެމަނިކުފާނު ކުރެއްވި އެކްސް ޕޯސްޓުގައި، ރައީސް މުއިއްޒު ސިފަކުރައްވާފައިވަނީ ލަދު ހަޔާތެއް ނެތް ވެރިއެއްގެ ގޮތުގައެވެ.

ޑރ. ޖަމީލު ވަނީ ރައީސް މުއިއްޒު ރައްޔިތުންނަށް ވިއްކި ވާހަކަ މުޅިން ބަދަލުވެއްޖެކަން ފާހަގަކުރައްވާ މިވެރިމީހާ މިއަދު ދައްކާ ވާހަކަ މާދަން ބަދަލުވާނެ ގޮތެއް ނޭގޭ ކަމަށް ވެސް ވިދާޅުވެފައެވެ.

ހަމައެހެންމެ މިހާރު ރައީސް މުއިއްޒުގެ ކިބައިން ފެންނިވަޑައިގަންނަވަމުން ދަނީ ބަތްކައްކާ ކުޅޭ ސިޔާސަތުކަމަށް ވިދާޅުވެ ޑރ.ޖަމީލު ވަނީ ރައީސް މުއިއްޒަށް މަގާމު ލިބިވަޑައިގެންނެވީ ކޮންވާހަކައެއް ވިއްކައިގެން ކަމާ މެދު އުފައްދަވާފައިވެއެވެ. އަދި މިހާރު ރައީސް މުއިއްޒުގެ ކިބައިން ފެނިގެން ވަޑައިގަންނަވަމުންދާ ބަހާ އަމަލާ ދިމާނުވުމަށް ވުރެ ބޮޑޫ ގައްދާރުވުމެއް ގައުމަށް ކޮބައިތޯ އައްސަވާ ޑރ. ޖަމީލުވަނީ ރައީސް މުއިއްޒަށް ސުވާލެއްވެސް އަމާޒުކުރައްވާފައެވެ.

ޑރ، ޖަމީލު މިމޭރުމުން ވިދާޅުވެފައިވަނީ މިއަދު މާލެ ސިޓި ކައުންސިލަށް ރައީސް މުއިއްޒު ޒިޔާރަްތކުރެއްވުމަށް ފަހު މީޑިޔާއަކަށް ދެއްވި ބަސްދީގަތުމެއްގައި، ރައީސް އަބްދުﷲ ޔާމީންގެ ޝަރީއަތަށް ނުފޫޒު އެމަނިކުފާނު ވެރިކަމާ ހަވާލުވެވަޑައިގެން ފަހުން ނުފޯރުވާ ކަމަށާ އަދި ޚާރިޖީ ސިޔާސަތު އޮތީ ކުރިންވެސް އެމަނިކުފާނު ދެންނެވި ފަދައިން ކަމަށް ވިދާޅުވެ ވާހަކަފުޅު ދައްކަވާފައިވަނިކޮށްކަން ފާހަގަކޮށްލެވެއެވެ. އަދި ރައީސް މުއިއްޒު ވަނީ އެމަނިކުފާނު ރިޔާސީ އިންތިޚާބުގައި އެންމެ ގިނައިން ބޭނުންކުރެއްވި ކެމްޕެއިން ސްލޯގަން، "އިންޑިއާ އައުޓު" އާ ގުޅުން ހުރި ހަރަކާތްތައް ހިންގަން ފުރުސަތު މިހާރު ނުދެއްވާނެ ކަމަށް ވިދާޅުވެފައެވެ.