ވިއްސާރަ ވުމުގެ ސަބަބުން މާދަމާއަކީ ރަސްމީ ބަންދު ދުވަހެއްގެ ގޮތުގައި ސަރުކާރުން ހަމަޖެއްސި ނަމަވެސް ރައްޔިތުން މަޖިލީހުގެ ޖަލްސާ މާދަމާ އޮންނާނެ ކަމަށް މަޖިލީހުގެ އިދާރާއިން ބުނެފި އެވެ.

މިކަން "ތޭރަ އޮންލައިން" އަށް މަޖިލީހުގެ ޑިރެކްޓަރު އޮފް ކޮމިއުނިކޭޝަން ހަސަން ޒިޔާއު ވަނީ ކަށަވަރު ކޮށްދެއްވާފަ އެވެ.

އެގޮތުން ޒިޔާއު ވިދާޅުވީ މާދަމާއަކީ މަޖިލީހުގެ ރަސްމީ ދުވަހެއް ކަމަށާއި އެޖެންޑާއަށް އެއްގޮތަށް މާދަމާ ވެސް ޖަލްސާ އޮންނާނެ ކަމަށެވެ.

މާދަމާ އޮންނާނީ 20 ވަނަ މަޖިލީހުގެ 28 ވަނަ ޖަލްސާ އެވެ.

މާދަމާގެ އެޖެންޑާވެސް މަޖިލީހުން މިހާރު ވަނީ އާންމުކޮށްފަ އެވެ.

ސަރުކާރުގެ ފަރާތުން ބިލެއް ހުށަހެޅުމާއި މިހާރު މަޖިލީހުގައި އޮތް ތިން ބިލަކަށް ބަހުސް ކުރުމުގެ އިތުރުން ޖަލްސާގައި ސްޕޯޓްސް މިނިސްޓަރު އަބްދުﷲ ރާފިއު މަޖިލީހަށް ހާޒިރުކޮށް ސުވާލުކުރުން ވެސް މާދަމާ އަށް ވަނީ އެޖެންޑާކޮށްފައެވެ.