ރާއްޖޭގެ ބޮޑު ބަޔަކަށް ނެރުނު ރީނދޫ ސަމާލު މިއަދު 4 ވަނަ ފަހަރަށް ދަންމާލައިފިއެވެ.

މޫސުމާ ބެހޭ ގައުމީ އިދާރާ (މެޓް)އިން ހއ. އަތޮޅުން ފެށިގެން އދ. އަތޮޅާ ހަމައަށް ހެނދުނު 10:00 އިން 14:00 އަށް ނެރުނު ރީނދޫ ސަމާލު މިހާރުވަނީ ހއ. އަތޮޅުން ފެށިގެން ފ. އަތޮޅާއި ހަމައަށް ނެރެފައެވެ. އަދި މުއްދަތި ވަނީ މިއަދުގެ އިރުއޮއްސި 6:00 އާ ހަމައަށް ދަންމާލާފައެވެ.

މެޓުން ހާމަކޮށްފައިވާ ގޮތުގައި ސަމާލުގެ ވަގުތު ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައި ގަދަވެ، ކަނޑުތައް ވަރަށް ގަދަވާނެ ކަމަށް ލަފާ ކުރެވޭ ކަމަށެވެ.

ސަމާލު ނެރެފައިވަނީ ވައިި ގަދަވާނެ ކަމަށް ލަފާކޮށެވެ.

މުޅި ރާއްޖެއަށް މިހާރު ކުރަމުންދާ ވިއްސާރާގައި މާލެ އާއި އަތޮޅުތެރޭގެ ރަށްތަކުގައި އިއްޔެ ވަނީ ވަރަށް ބޮޑަށް ފެން ބޮޑުވެފައެވެ. އެގޮތުން 20 ރަށެއްގައި ފެން ބޮޑުވެ، ބައެއް ގޭގެއަށް ފެން ވަދެ ގެއްލުންތަކެއް ލިބުނު އިރު، މާލޭގެ 250 އަށްވުރެ ގިނަ ގެއެއްގައި ފެންބޮޑުވެގެން ރިޕޯޓްކުރިއެވެ.

މެޓް އޮފީހުން ލަފާކުރާ ގޮތުގައި ކުރިއަށް އޮތް ތިން ދުވަހުވެސް މޫސުން ރަނގަޅު ގޯސްވާނެއެވެ.