ލޭނުގައި ޖެހި މަރުވެފައިވާ މިޔަރު އެއްގަމަށް ގެނެސް،މިޔަރު ޕްރޮސެސް ކުރުމަށް ހާއްސަ ލައިސަންސެއް ދޫކުރުމަށް ނިންމާފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވެއްޖެެއެވެ.

ލޭނު މަސްވެރިކަން ކުރުމުގެ ގަވާއިދުގެ ދެލިކޮޕީއަށް އާންމުންގެ ހިޔާލާއި ކޮމެންޓު ހޯދުމަށް އެ ވުޒާރާއިން މިހާރު ވަނީ ހުޅުވައިލައިފައެވެ. މި ގަވާއިދުގެ ދެލިކޮޕީއަށް ހިޔާލު ހުށަހެޅުމުގެ ސުންގަޑިއަކީ މި މަހުގެ 18 ވަނަ ދުވަހެވެ. މިގަވާއިދާ ބެހޭ ގޮތުން އެއްވެސް ޚިޔާލެއް ނުވަތަ ކޮމެންޓެއް ވާނަމަ، ހިޔާލު ހުށަހެޅުމުގެ ސުންގަޑީގެ ކުރިން [email protected] އަށް އީމެއިލް ކުރެވޭނެއެވެ.

އެ ވުޒާރާއިން މިއަދު ނެރުނު ބަޔާނެއްގައި ވިދާޅުވީ، ރާއްޖޭގެ މަސްވެރިކަމާއި އިގްތިސާދީ މަސައްކަތްތައް ފުޅާކޮށް އެކަމުން ލިބޭ ނަފާ އިތުރުކުރުމަކީ މިސަރުކާރުގެ އަމާޒު ކަމަށެވެ. މިގޮތުން ލޭނު މަސްވެރިކަމުގައި ހިފޭ މިޔަރު އަދި މަސްވެރިކަމުގައި އަމާޒުނުކުރާ ބާވަތްތައް (ބައިކެޗް) ދުނިޔެ ގަބޫލުކުރާ ބެސްޓް ޕްރެކްޓިސްތަކާއި ހަމަތަކުގެ މަތިން އެއްގަމަށް ގެނެސް، މިޔަރުގެ ބާވަތްތައް ޕްރޮސެސްކުރުމުގެ ހުއްދަ އޮތް ފެސިލިޓީތަކުން ޕްރޮސެސްކުރުމުގެ ފުރުސަތު މި ގަވާއިދުގެ ދަށުން ފަހިވެގެން ދާނެ ކަމަށް ވިދާޅުވެފައި ވެއެވެ.

އެހެންނަމަވެސް މިއީ ރާއްޖޭގައި މިޔަރު މަސްވެރިކަން ކުރުމަށް ހުޅުވާލުން ނޫން ކަމަށާއި އަދި ހުޅުވާލުމުގެ ވިސްނުމުގައި ގައި އަޅާ ފިޔަވަޅެއްވެސް ނޫންކަމަށް އެ ވުޒާރާއިން މައުލޫމާތު ދެއްވައެވެ.