ގަވާއިދާ ޚިލާފަށް ރަޖިސްޓަރީކޮށްފައިވާ އުޅަނދުފަހަރުގެ މައްސަލަ ޙައްލުކޮށް ގަވައިދަށް ފަންތަން ވަގުތު ދެއްވަން ސަރުކާރުން ނިންމަވައިފިއެވެ.

މިނިސްޓްރީ އޮފް ހޯމްލޭންޑް ސެކިއުރިޓީން އިޢުލާންކޮށްފައިވާ ގޮތުގައި، ގަވާއިދާ ޚިލާފަށް ރަޖިސްޓަރީކޮށްފައިވާ އުޅަނދުފަހަރުގެ މައްސަލަ ޙައްލުކުރުމަށް ވަކި މުއްދަތެއް ދިނުމަށް ނިންމާފައިވެއެވެ. މާލެ ސަރަޙައްދުގެ ޓްރެފިކް އަދި ޕާކިންގ މައްސަލަތަކަށް އަވަސް ޙައްލެއް ހޯދުމަށްޓަކައި ބޭއްވި ބައްދަލުވުމަކަށްފަހު މިނިސްޓަރ އަލީ އިޙްސާން މަޢުލޫމާތު ދެއްވިއެވެ.

މިނިސްޓަރ ވިދާޅުވީ، ރައްޔިތުން ޚަރަދުކޮށްގެން ގަނެފައިވާ އުޅަނދުތައް ގަވާއިދާ އެއްގޮތަށް ބޭނުން ކުރުމުގެ ފުރުސަތު ފަހިކޮށްދެއްވުމަށް މަސައްކަތް ކުރަމުން އަންނަ ކަމުގައެވެ.

މީގެއިތުރުން، މާލޭ ސަރަޙައްދުގައި ގަވާއިދާ ޚިލާފަށް ޕާކުކުރާ އުޅަނދުތައް ޓޯވުކުރުމަށް 9 ސަރަޙައްދެއް ކަނޑައަޅާފައިވާކަމަށާއި، މި ސަރަޙައްދުތައް އަވަހަށް އިޢުލާންކުރާނެކަމަށްވެސް މިނިސްޓަރ ހާމަކުރެއްވިއެވެ.

މި ފިޔަވަޅުތަކަކީ މާލޭގެ ޓްރެފިކް އަދި ޕާކިންގ މައްސަލަތައް ޙައްލުކުރުމަށް އެޅޭ މުހިންމު ފިޔަވަޅުތަކެއް ކަމަށްވެސް މިނިސްޓަރ ވިދާޅުވިއެވެ.