މާލެ ސަރަހައްދުގައި މިހާރު ހުރި އެންމެ އަގުބޮޑު ލަގްޒަރީ އެޕާޓުމެންޓު ބިލްޑިންކަމަށްވާ އެފްޑަބްލިއު ރެޒިޑެންސް ބިލްޑިންއިން ކުރީގެ ސްޓޭޓު މިނިސްޓަރު ޒިފްލީނާ ހަސަން އެޕާޓުމެންޓެއް ބައްލަވައިގެންނެވި މައްސަލައާ ގުޅިގެން އެންޓި ކޮރަޕްޝަން ކޮމިޝަނުން ހިންގި ތަހުގީގު ނިންމާ ދައުވާ ކުރުމާމެދު ގޮތް ނިންމަން ޕްރޮސެކިއުޓަރު ޖެނެރަލްގެ އޮފީހަށް މައްސަލަ ފޮނުވައިފިއެވެ.

ހުޅުމާލެގެ އެފްޑަބްލިއު ރެސިޑެންސްގެ 1،200 އަކަފޫޓުގެ ފްލެޓެއް ޒިފްލީން 3.5 މިލިއަން ރުފިޔާއަށް ބައްލަވައިގަތްކަމަށް މީޑިއާތަކަށް އެނގިފައި ވަނީ، ސިވިލް ކޯޓުން އެޕާޓްމަންޓަށް ޒިފްލީނާ ހައުސިން ޑިވެލޮޕްމަންޓް ކޯޕަރޭޝަން ދެމެދު ކުރި މުއާމަލާތާއި ގުޅޭ ހުކުމް އާންމު ކުރުމުންނެވެ.

އެ ހުކުމުން އެނގޭ ގޮތުގައި، އެ އެޕާޓްމަންޓު ޒިފްލީނާ ގަނެފައި ވަނީ ޖުމްލަ ތިން މިލިއަން ފަސްލައްކަ ފަސްދޮޅަސް ތިންހާސް ހަސަތޭކަ ސާޅީސް ހަތް ރުފިޔާއަށެވެ. އަދި ހުކުމުގައި ވަނީ، އެ ފައިސާ އެޕާޓްމަންޓު ވިއްކާ ފަރާތަކަށް ދައްކައި ހަލާސްކޮށްފައިވާކަމަށެވެ. އެ ފްލެޓު ގަނެފައިވާ ތާރީހާއި، ފައިސާ ދެއްކި ގޮތުގެ ތަފްސީލެއް ހުކުމުން އެނގެން ނެތް އިރު އެއީ ޒިފްލީނާ ކޮން ގޮތަކުން ހޯދި ފައިސާއެއް ތޯ ބެލުމަށް ގޮވާލައި ބައެއް މީހުން ނުރުހުންފާޅު ކުރިއެވެ.

ޒިފްލީނާ ފުލެޓު ބައްލަވައިގެންނެވި މައްސަލަ އޭސީސީއަށް ހުށަހަޅާފައިވަނީ ފުލުހުންނެވެ. ފުލުހުން ބުނި ގޮތުގައި އެ މައްސަލަ އޭސީސީއަށް ހުށަހެޅީ ފުލެޓު މައްސަލަ އަމިއްލަ ފަރާތަކުން ފުލުހުންގެ އިދާރާއަށް ހުށަހެޅުމާ ގުޅިގެންނެވެ. 

އޭސީސީން މިރޭ ބުނީ އެ ކޮމިޝަންގެ ތަހުގީގަށް ފަހު ދައުވާ ކުރުމާމެދު ގޮތް ނިންމަން ޕީޖީ އޮފީހަށް މައްސަލަ ފޮނުވާފައިވާ ކަމަށެވެ.

މިއީ ނުހައްގު މުއްސަނދިކަން ލިބިފައިވުންކަމަށް ބަލައި ދައުވާ ކުރުމަށް ގޮވާލަމުން ދާތީ ޒިފްލީނާ ވިދާޅުވީ، ގިނަ ބައެއްގެ ސަމާލުކަމަށް އައި ކޯޓުގެ ނިންމުމަކީ އެއީ ހައުސިން ޑިވެލޮޕްމަންޓު ކޯޕަރޭޝަނުން ނިންމި އިދާރީ މަސައްކަތްކަމަށެވެ. އަދި އެ އެޕާޓްމަންޓުގައި ދިރިއުޅޭތާ ވެސް މިހާރު ހަތަރު އަހަރުވެފައިވާކަމަށް ވިދާޅުވިއެވެ. ނަމަވެސް އެ ފުލެޓުތަކަށް މީހުން ވަންނަން ފެށީ 2021 ވަނަ އަހަރު ކަމަށްވާތީ އެ އެޕާޓުމެންޓުގައި އޭނާ ހަތަރު އުޅުއްވާނެ ގޮތެއް ނޯންނާނެ ކަމަށް ބައެއް މީޑިއާއިން ރިޕޯޓުކޮށްފައިވެއެވެ.