ތަނުގައި ކޮރަޕްޝަން ހިންގާކަމުގެ ތުހުމަތުގައި ހަތަރު މުވައްޒަފުން ވަކިކުރަން ނިންމާފައިވަ ވުމާ ގުޅިގެން، އިތުރު މުވައްޒަފުންގެ ބަސް ހޯދުމަށް އެދި ޓެކްސް އެޕީލް ޓްރައިބިއުނަލްގެ މުވައްޒަފުން ރައްޔިތުންގެ މަޖިލީހަށް ސިޓީއެއް ފޮނުވައިފިއެވެ.

އެ ޓްރައިބިއުނަލްގެ ހަތަރު މެންބަރަކު ވަކިކުރުމަށް ސަރުކާރަށް ލަފާ ދިނުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީން ނިންމި މައްސަލާގައި، އެ ތަނުގެ ސެކްޝަންތަކުގެ ހެޑުން ހިމެނޭ ގޮތަށް އިތުރު މުވައްޒަފުންގެ ބަސް ހޯދައި މައްސަލަ އިތުރަށް ބެލުމަށް ރައްޔިތުންގެ މަޖިލީހަށް ފޮނުވި އެ ސިޓީގައި ވަނީ އެދިފައެވެ.

ޓްރައިބިއުނަލްގެ މެންބަރު އިސްމާއީލް ސާޖިދު އެ ތަނުގެ އެހެން މެންބަރުން ކޮރަޕްޝަންގެ ބައެއް އަމަލު ހިންގާ ކަމަށް ތުހުމަތުކޮށް މަޖިލީހަށް ސިޓީއެއް ފޮނުވުމުން ކުރިން ވަނީ އެ މައްސަލަ ބަލައި ސާޖިދު ފިޔަވައި އެހެން މެންބަރުން ވަކިކުރުމަށް ލަފާ ދިނުމަށް ނިންމާފައެވެ.

އޭގެ ފަހުން ކޮމިޓީން މައްްސަލަ އިތުރަށް ބަލައިދިނުމަށް އެދި، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް އެޑްރެސްކޮށް، ޓެކްސް ޓްރައިބިއުނަލްގެ 16 މުވައްޒަފަކު ސޮއިކޮށް މިދިޔަ ބުރާސްފަތި ދުވަހު ސިޓީއެއް ފޮނުވާފައިވެއެވެ. ޓްރައިބިއުނަލްގައި ޖުމުލަ ތިބެނީ 20 މުވައްޒަފުންނެވެ.

މުވައްޒަފުން ފޮނުވި ސިޓީގައި ގިނަ ކަންކަމުގައި ކަންބޮޑުވުން ފާޅުކޮށްފައިވާއިރު، އެ ސިޓީގައި މައިގަނޑު ގޮތެއްގައި ކަންބޮޑުވުމެއްގެ ގޮތުގައި ފާހަގަކޮށްފައިވަނީ މަޖިލީހުގެ ކޮމިޓީން ހަމައެކަނި ޓްރައިބިއުނަލްގެ މެންބަރުންގެ އިތުރަށް ޓްރައިބިއުނަލްގެ ރަޖިސްޓްރާގެ ބަސް ހޯދުމެވެ.

އެގޮތުން ޓްރައިބުނަލްގެ މެންބަރުން ކޮރަޕްޝަން ހިންގި ކަމަށް ތުހުމަތުކުރާއިރު އެއިން ބައެއް ކަންކަމަކީ ޓްރައިބިއުނަލްގެ ހަތަރު ސެކްޝަނަށް ވެސް އެނގިގެން ހިނގާނެ ކަންކަން ފާހަގަކޮށް، ސެކްޝަންތަކުގެ ހެޑުންގެ ބަހެއް ހޯދުމަށް އެ ސިޓީގައި އެދިފައިވެއެވެ.

މާލިއްޔަތު ގަވާއިދާ ހިލާފަށް މުއާމަލާތެއް ހިންގި ކަމަށް ތުހުމަތު ކުރާ އިރު، ޓްރައިބިއުނަލްގެ މާލީ ޒިންމާދާރު ވެރިޔާ، ޓްރައިބިއުނަލްގެ އެޑްމިިނިސްޓްރޭޓާގެ ބަހެއް ވެސް ހޯދަން ވާނެ ކަމަށް ސިޓީގައި ފާހަގަކޮށްފައިވެއެވެ.

މެމްބަރުންގެ މަޖިލީހުގެ ޔައުމިއްޔާތައް ބެލެެހެއްޓުމަށް ހަވާލުވެފައިވާ ލީގަލް، ރިޕޯޓިން، އެންޑް ކޭސް މެނޭޖުމަންޓް ސެކްޝަންގެ ހެޑުގެ ބަހެއް ހޯދަން ވާނެ ކަމަށް ސިޓީގައިވެއެވެ.

މައްސަލަތައް ބެލުމުގައި ދެން ބައިވެރިވާ އެސެސްމަންޓް އެންޑް އިވެލުއޭޝަން ސެކްޝަންގެ ހެޑުގެ ބަހެއް ވެސް ހޯދަން ވާނެ ކަމަށް ސިޓީގައިވެއެވެ.

މުވައްޒަފުންނާއި ސެކްޝަންތަކުގެ ހެޑުންގެ ބަސް ހޯދުމެއް ނެތި ކުރެވޭ ތުހުމަތަކަށް ބިނާކޮށް މެންބަރުން ވަކިކުރަން ނިންމުމުން ޓެކްސް ޓްރައިބިއުނަލްގެ ބެކްލޮގުގައި ހުރި 40 އަށް ވުރެ ގިނަ މައްސަލަ ބަލަން ކުރަން ޖެހޭ މަސައްކަތްތައް އަލުން ތަކުރާރުކުރަން ޖެހުމަކީ ވަރަށް ބޮޑު ބުރައެއް ކަމަށް ލިޔެފައިވެއެވެ.

ޓްރައިބިއުނަލްގެ މެމްބަރު ސާޖިދު ފޮނުވި ސިޓީއާ އެކު މައްސަލަ ބަލާ ވަކިކުރަން ކުރަން ނިންމާފައިވާ މެމްބަރުންނަކީ ޓްރައިބިއުނަލްގެ ރައީސް މުހައްމަދު މުނައްވަރު އަލީ އާއި، ޓްރައިބިއުނަލްގެ ނައިބު ރައީސް ހުސައިން ޒައިދާން ޖަލީލްއާއި، މެންބަރު އަހުމަދު އަޝްރަފު، އަދި މެންބަރު ހަޖީދާ ނައީމެވެ.