ވ. އާރަށުގެ މައްސަލައިގައި ރައީސް އަބްދުﷲ ޔާމީންގެ މައްޗަށް އިއްވި ޖަލު ހުކުމް ބާތިލުކޮށް އެ މައްސަލަ އަލުން ބަލަން ހައިކޯޓުން ކުރި ހުކުމާ ގުޅިގެން އެ މައްސަލަ އަލުން ބަލަން މިހަފުތާގައި އެ މައްސަލައިގެ އަޑުއެހުންތައް ފެށުމަށް ތައްޔާރުވެއްޖެއެވެ.

އެގޮތުން މައްސަލައިގެ އަޑުއެހުންތައް ކުރިމިނަލް ކޯޓުގައި މި ހަފުތާގެ އަންގާރަ ދުވަހު ފެށުމަށް ވަނީ ނިންމާފައިކަން ތޭރަ އޮންލައިނަް ވަނީ ކަށަވަރުވެފައެވެ. އަދި މައްސަލައިގައި ހިމެނޭ ޚަސްމުންނަށް ވަނީ ޗިޓުވެސް ފޮނުވާފައެވެ.

އާރަށުގެ މައްސަލަ އަލުން ބެލުމަށް ހައިކޯޓުން ކުރި ހުކުމުގެ ބައެއް ޕްރޮސިކިއުޓާ ޖެނެރަލްގެ އޮފީހުން ވަނީ ސުޕްރީމް ކޯޓުގައި ވެސް އިސްތިއުނާފު ކޮށްފައިވެއެވެ.

ޕީޖީން ސުޕްރީމް ކޯޓުގައި އިސްތިއުނާފު ކޮށްފައިވަނީ ހައިކޯޓުގެ ނިންމުމުގައި މައްސަލަ އަލުން ބަލައި ގޮތެއް ކަނޑައަޅަން އެންގިއިރު، ދައުލަތުން ހުށަހެޅި ހެކިތައް އެއްފަރާތްކުރުމަށް އަންގާފައިވާ ބައެވެ. އެގޮތަށް ހައިކޯޓުން އެންގީ އެ ހެކިތައް ދަށު ކޯޓަށް ބަލައިގަތުމުގެ އިޖުރާއަތް ރަނގަޅުނޫންކަމަށް ބުނެއެވެ.

ޕީޖީން ބުނެފައިވަނީ އެ ހެކިތައް ބަލައިގަތުމަށް ދަށު ކޯޓުން ނިންމި އިޖުރާއަތަކީ މައްސަލަ އަލުން ބަލައި ގޮތެއް ކަނޑައަޅާއިރު އިސްލާހު ކުރެވިދާނެ އިޖުރާއަތެއް ކަމަށެވެ. އަދި އެ ހެކިތައް އެއްފަރާތްކުރުމަށް ހައިކޯޓުން އެންގި އެންގުމަކީ ސުޕްރީމް ކޯޓުން ކުރިން ނިންމާފައިވާ ނިންމުންތަކާ އަރާރުންވާ ނިންމުމެއް ކަމަށްވެސް ޕީޖީ އޮފީހުން ބުނެފައިވެއެވެ.

ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިިން ކުށް ރައީސް ޔާމީންގެ މައްޗަށް ސާބިތުވާ ކަމަށް ކަނޑައަޅާ 11 އަހަރަށް ޖަލަށް ލުމާއި 5 މިލިއަން ޑޮލަރުން ޖޫރިމަނާކުރުމަށް އަދި ޔޫސުފް ނައީމްގެ މައްޗަށް ރިޝްވަތު ދިންކަމުގެ ކުށް ސާބިތުވެ 3 އަހަރާއި 2 މަހާއި 12 ދުވަހުގެ ޖަލު ހުކުމެއް ކްރިމިނަލް ކޯޓުން ކުރީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.

މި މައްސަލަ ރައީސް ޔާމީން އަދި ޔޫސުފް ނައީމްގެ ފަރާތުން ހައިކޯޓުގައި އިސްތިއުނާފު ކުރުމުން ހައިކޯޓުން ކަނޑައަޅާފައިވާ އުޞޫލުތަކާ އެއްގޮތަށް ކްރިމިނަލް ކޯޓުގެ ނިންމުމާމެދު އަލުން ގޮތެއް ކަނޑައެޅުމަށްޓަކައި މައްސަލަ ކުރިމިނަލް ކޯޓަށް ތަޙުވީލު ކޮށްފައިވަނީ 18 އެޕްރީލް 2024 ދުވަހުއެވެ.

ރައީސް ޔާމީންގެ ޝަރީއަތް އަލުން ފަށަން ދައުލަތުން މަސައްކަތްކުރަނީ ޕީޖީގެ މަގާމުގައި ހުންނެވި، ޕިއެންސީއިން ހިމާޔަތް ދީފައިވާ އެމްޑީއެން ޝަމީމު މަގާމުގައި ދައުރު ނިމެންދެން ބެހެއްޓުމަށް ރައީސް މުހައްމަދު މުއިއްޒު ހެއްދެވި ޑީލެއްގެ ތެރެއިން ކަމަށް އަޑު ފެތުރިފައިވެއެވެ.