އޭނާގެ ދަރިންގެ ފްލެޓުތަކާ ގުޅިގެން އަބުރު ކަތިނުލާ، މައްސަލައެއް އޮތް ނަމަ އެންޓި ކޮރަޕްޝަން ކޮމިޝަން (އޭސީސީ)އަށް ހުށަހެޅުމަށް އެމްޑީޕީގެ ރައީސް އަދި ކުރީގެ ޚާރިޖީ ވަޒީރު އަބްދުﷲ ޝާހިދު އެދިއްޖެއެވެ.

އޭނާ މިފަދައިން އެދިފައިވަނީ އެކްސްގައި ކުރި ޕޯސްޓެއްގައެވެ.

އެގޮތުން ރައީސް އޮފީހުގެ އިސް ތަރުޖަމާނު ހީނާ ވލީދުގެ މަސްއޫލުވެރިކަމުގެ ދަށުން ހިންގާ އޮންލައިން ނޫސް، ދިޔަރެސްގައި ޝާހިދުގެ ދަރިފުޅު، މޫސާ ޔަމީން އާ އަދި އަނެއް ދެ ފިރިހެން ކުދިންވެސް ހުޅުމާލެ އިން އަގުބޮޑު ފްލެޓްތަކެއް ގަނެފައިވާ ކަމަށް ބުނެ ރިޕޯޓުކޮށްފައިވާތީ އެކަމަށް ޝާހިދު ވަނީ ރައްދު ދީފައެވެ.

ޝާހިދު އެކްސްގައި ކުރި ޕޯސްޓުގައިވަނީ، އެއީ އޭނާއާ އާއިލާގެ އަބުރު ކަތިލުމުގެ މަގުސަދު ގައި ފަތުރަމުންދާ ވާހަކަތަކެއް ކަމަށެވެ. އެ ރިޕޯޓްގައިވާ ގޮތުން ޝާހިދުގެ، މޫސާ ޔަމީން ވަނީ ހުޅުމާލެ އިން ރެއިންބޯގެ ރެއިންކްރެސްޓް އެޕާޓްމަންޓުން ޕެންޓްހައުސް ގަނެފައެވެ.

އެ ކަމަށް އިޝާރާތްކުރައްވާ ޝާހިދުގެ ޕޯސްޓުގައި އިތުރަށް ވަނީ ޔަމީން، ރެއިންކުރެސްޓް އިން ގަނެފައިވާ އެޕާރޓްމެންޓް ގަނެފައިވަނީ ބޭންކް އިން ލޯނެއް ނަގައިގެން ކަމަށާ އަދި މިހާރުވެސް ގެންދަނީ ލޯނު އަނބުރާ ދައްކަމުން ކަން ހާމަކޮށްފައެވެ.

މީގެ އިތުރުން ދިޔަރެސްގައި އެބުނާ އެޕާޓްމެންޓްތައް ގަނެފައިވަނީ ސަރުކާރުގެ ވަޒީރުކަމުގައި ހުރެ މިދިޔަ 5 އަހަރުގެ ތެރޭގައި ނޫންކަމަށްވެސް ޝާހިދު ފާހަގަކޮށްފައިވެއެވެ. އަދި އޭނާގެ ގެ 10 ފަންގިފިލާއަށް ނަގާ ކުއްޔަށް ދޫކުރުމުގެ ވިޔަފާރީގައި އުޅޭތާ އަންނަތާ އެތަށް ޒަމާނެއް ވެއްޖެކަމަށާ އޭނާއާ އާއިލާއަށް ބޭނުންވާ ކަންތައްތައްް ގާނޫނުގެ އިމުގެތެރޭގައި ކުރެވޭވަރުގެ ތަނަވަސް ކަން ވަނީ ﷲގެ ރަހްމަތްފުޅުން މިންވަރު ކުރައްވާފައިވާ ކަމަށެވެ.

ޕޯސްޓު ނިންމާލަމުން ޝާހިދުވަނީ އޭނާއާ އާއިލާއަށް ތުހުމަތުކުރާ ފަރާތްތަކުން އަބުރު ކަތިނުލާ އެ ފްލެޓުތަކާ ގުޅިގެން އެއްވެސް މައްސަލައެއް އޮތް ނަމަ އެކަން އޭސީސީއަށް ހުށަހަޅާއިގެން ކުރިއަށް ގެންދުމަށް އެދިފައެެވެ.