އެމްޕޮކްސް، ރާއްޖޭގައި ފެތުރުމުގެ ފުރުސަތު އޮތްތޯ ބެލުމަށް ހަދަމުންދާ އެސެސްމެންޓްގެ ތެރެއިން، އެ ބައްޔަށް ޓެސްޓު ކުރުމާއި ފަރުވާ ދިނުމަށް ވާންޖެހޭ ތައްޔާރީތައް ވަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

އެޗްޕީއޭއީން އާންމުކުރި ބަޔާނެއްގައި ބުނެފައިވަނީ އެޗްޕީއޭ އިން ބުނީ ދުނިޔޭގައި މި ބަލި ފެތުރެން ފެށުމާއެކު އެ އެޖެންސީން ބަލީގެ ހާލަތު މޮނީޓާރކޮށް، ބައްޔާ ގުޅިގެން ރާއްޖެއިން ވާންޖެހޭ ތައްޔާރީތައް ވަމުންދާ ކަމަށެވެ.

އެގޮތުން، ރާއްޖެއަށް ބަލި އައުމުގެ ފުރުސަތު އޮތް މިންވަރު ދެނެގަތުމާއި، ބަލި ފެތުރުން ކޮންޓްރޯލް ކުރުމަށާއި، ބައްޔަށް ޓެސްޓު ކުރުމަށާއި ފަރުވާ ދިނުމަށް ވާންޖެހޭ ތައްޔާރީތައް ވަމުންދާ ކަމަށް ބުނެފައިވެއެވެ.

މީގެ އިތުރުން، ބައްޔަށް ސިއްހީ ހިދުމަތްތެރިން އަހުލުވެރިކުރުމާއި ސާވެއިލެންސް ހަރުދަނާ ކުރުމުގެ މަސައްކަތް ވެސް ދަނީ ކުރެވެމުން ކަމަށްވެސް އެޗްޕީއޭއިން ހާމަކޮށްފައިވެއެވެ.

އެޗްޕީއޭއިން ބުނި ގޮތުގައި މިވަގުތު ހަލުވިކަމާއެކު ބަލި ފެތުރެމުންދަނީ ކޮންގޯ އަދި އެފްރިކާގެ ބައެއް ގައުމުތަކުގަ އެވެ. 2022 ވަނަ އަހަރުން ފެށިގެން މިއަހަރުގެ މިހާތަނަށް 116 ގައުމަކުން މި ބަލީގައި 99،000 އަށްވުރެ ގިނަ ކޭސް ވަނީ ފެނިފައެވެ.

އެމްޕޮކްސްގެ މިހާރު ފެތުރެމުންދާ ސްޓްރެއިން އާންމު ގޮތެއްގައި ފެތުރެނީ ޖިންސީ ގުޅުން ހިންގުމުގެ ސަބަބުން ނަމަވެސް އެހެން ގޮތްގޮތުން ވެސް ބަލި ފެތުރުމުގެ ފުރުސަތު އޮންނަ ކަމަށް އެޗްޕިއޭގެ ބަޔާނުގައި ބުނެފައިވެއެވެ.

އެފްރިކާގައި އެމްޕޮކްސް ހަލުއިކަމާއެކު ފެތުރެމުންދާތީ، އެ ބަލީގެ ސަބަބުން ދުނިޔެއަށް ނުރައްކަލެއް އޮތްކަމަށް ފެންނާތީ މިމަހުގެ 14 ވަނަ ދުވަހު އާންމު ސިއްހަތުގެ ކުއްލި ނުރައްކާ ވަނީ އިއުލާނުކޮށްފައެވެ. 

މި ބަލި ޖެހިފައިވާ މީހާގެ ހަމުގައި ހުންނަ ބިހިތަކުގައި ނުވަތަ އެއިން ނުކުންނަ ދިޔައިގައި ޖެހުމުން ވެސް ބަލި ޖެހެއެވެ. އަދި، ބަލި މީހާ ބޭނުން ކުރާ ހެދުން، ތުވާލި އަދި ބެޑްޝީޓު ފަދަ ތަކެތީގައި ޖެހުމުގެ އިތުރުން ނޭވާލާ ނިޒާމުގެ ޒަރިއްޔާއިން ވެސް އެހެން މީހުން ގަޔަށް ބަލި ޖެހެ އެވެ.

ބަލީގެ އަލާމާތްތަކުގެ ތެރޭގައި، ހުންއައުން، ގައިގައި ރިއްސުން، ވަރުބަލިވުން،  ގޮށްލުން އަދި  ހަމުގައި ބިހި ނެގުން ހިމެނެއެވެ.

މި ބައްޔަކީ ވަކި ހާއްސަ ފަރުވާއެއް ހޯދިފައި ނެތް ބައްޔެކެވެ. އެހެންކަމުން، ބަލި ޖެހިފައިވާ މީހާގެ ފަރާތުން ފެންނަ އަލާމާތްތަކަށް ބަލައި، ފޯރުކޮށްދެވެނީ ސަޕޯޓިވް ފަރުވާ އެކެވެ.