ދައުލަތުގެ މީޑިއާ ޕީއެސްއެމްއިން ބޭއްވި ޓެލެތޯނުން ލިބުނު 19 މިލިއަން ރުފިޔާ އަދިވެސް ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) އާ ހަވާލުނުކުރާކަން ހާމަވެއްޖެ އެވެ.

މި ޓެލެތޯން ކުރިއަށް ގެންދިޔައީ ޖޫން 12 ގެ ހެދުނު 8:00 އިން އެ ރޭ ދަންވަރު 12:00 އާ ހަމައަށެވެ.

އެގޮތުން އެ ދުވަހު ޓެލެތޯނުން ޖުމްލަ 18،418،922ރ. ( އަށާރަ މިލިއަން ހަތަރު ސަތޭކަ އަށާރަ ހާސް ނުވަ ސަތޭކަ ބާވީސް ރުފިޔާ) އާއި 49،800 (ސާޅީސް ނުވަ ހާސް އަށް ސަތޭކަ) ޑޮލަރު ވަނީ ލިބިފަ އެވެ.

މި ފައިސާ ފަލަސްތީނުގެ ރައްޔިތުންނަށް ފޯރުކޮށްދިނުމަށް އަންރުއާ މެދުވެރިކޮށް ސަރުކާރުން ދޭން ނިންމާފައި ވަނީ ޕީއެސްއެމް އިން ޖުލައި މަހުގެ 3 ގައި ފޮރިން މިނިސްޓްރީއާ ފައިސާ ހަވާލުކުރުމުންނެވެ.

މިކަން އެގޮތައް ކުރަން ނިންމާފައިވާކަން ރާއްޖެއިން އދ. އަށް ކަނޑައަޅުއްވާފައިވާ ދާއިމީ މަންދޫބު ޑރ. އަލީ ނަސީރު މުހައްމަދު ވަނީ އދ. ގެ މައި މަރުކަޒުގައި ޖުލައި 12، ގައި ކުރިއަށްދިޔަ "އަންރުވާ ޕްލެޖިން ކޮންފަރެންސް" ގައި ހާމަކުރައްވާފައެވެ.

ނަމަވެސް މި ފައިސާ މިހާތަނަށް އައި އިރުވެސް ހަވާލުކޮށްފައި ނުވާކަން ފާހަގަކޮށްލެވެ އެވެ.

ފަލަސްތީނާ އެކު އަބަދުވެސް ތިބިކަމަށް އަޑައަޑަށް ބާރުލައިފައި ސަރުކާރުން ބުނާ އިރުވެސް ފާހަގަކޮށްލެވޭ ގޮތުގައި ސަހްޔޫނީންގެ ޕާސްޕޯޓް މަނާ ނުކޮށް ވެސް އެތައް ބަހަނާއެއް ދައްކަވަމުން ގެންދާކަން ފާހަގަކޮށްލެވެ އެވެ.