ނިމިދިޔަ ހަފުތާތެރޭގައި ރާއްޖެއަށް ކުރި ވިއްސާރާގައި މާލެ ސަރަހައްދުގެ ގެތަކަށް ލިބުނު ގެއްލުން 8 ލައްކަ ރުފިޔާއަށް ވުރެ މަތި ކަމަށް ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ހާމަކޮށްފި އެވެ.

އެންޑީއެމްއޭއިން ބުނީ މާލޭން ފެން ބޮޑުވުމުގެ ސަބަބުން އެސެސްމަންޓް ހަދަން ޖެހޭ ކަމަށް 41 ގެއެއް ފާހަގަކުރެވުނު ކަމަށެވެ.

އެހެންނަމަވެސް ހަތަރު ގެއަކުން އެސެސްމަންޓް ހަދަން ބޭނުން ނުވާ ކަމަށް އެންގުމުން އެސެސްމަންޓް ހެދީ 37 ގެއެއްގެ ކަމަށް ވެސް އެ އޮތޯރިޓީން ފާހަގަކުރެއްވި އެވެ.

މާލޭގެ އިތުރުން ވިއްސާރާގައި ރާއްޖޭގެ އެހެން ރަށްރަށަށް ލިބުނު ގެއްލުންތައް މޮނިޓާރ ކުރުމުގެ މަސައްކަތް ކުރަމުންދާ ކަމަށް އެންޑީއެމްއޭން ވަނީ ބުނެފަ އެވެ.

ހޯމަ ދުވަހުގެ މެންދުރު ފަހު 2:00 ޖެހުމާ ހަމައަށް 13 ރަށެއްގެ 77 ގެއަކަށް ގެއްލުން ލިބިގެން އެސެސްމަންޓް ހެދުމަށް ފޯމު ހުށަހަޅާފައިވާ ކަމަށް އެންޑީއެމްއޭ އިން ބުނެފައި ވެއެވެ.

އަދި ތިން ރަށެއްގެ ދަނޑުބިންތަކަށް ވެސް ގެއްލުން ލިބިފައިވާ ކަމަށް އެ އޮތޯރިޓީން ވަނީ ހާމަކޮށްފަ އެވެ.