ބަޖެޓު ޑެފިސިޓް ފޫބެއްދުމަށްޓަކައި ބޭރު ގައުމުތަކުގެ އެހީހޯދަން މިހާ ދަތިވެގެން އުޅުނު ސަރުކާރެއް ފެނިވަޑައިގެންފައި ނުވާކަމަށް ކުރީ ސަރުކާރުގެ އެންވަޔަރމެންޓް މިނިސްޓަރު އާމިނަތު ޝައުނާ ވިދާޅުވެއްޖެއެވެ.

ޝައުނާ މިފަދައިން ވިދާޅުވެފައި ވަނީ ރާއްޖެ ޓީވީގެ ޕްރޮގްރާމެއްގައެވެ.

އެގޮތުން ޝައުނާ ވިދާޅުވީ ހާރިޖީ ސިޔާސަތަކީ ސަރުކާރެއް އިންތިހާބުވުމުން އިންތިގާލީ މަރުހަލާގައި އުފަންވާ އެއްޗެއް ނޫންކަމަށާއި އެއީ ޒަމާނުއްސުރެ ގައުމުތަކާއެކު އުފައްދާފައިވާ ގުޅުމުގެ ސަބަބުން ހިނގާ ކަމެއްކަމަށެވެ.

އެހެންނަމަވެސް މި ސަރުކާރުން ގެންގުޅޭ ހާރިޖީ ސިޔާސަތުގެ ސަބަބުން ބަޖެޓު ޑެފިސިޓް ފޫބެއްދުމަށް 9 މަސް ވެގެން ދިޔައިރުވެސް އެއްވެސް އެހީއެއް ސަރުކާރަށް ހޯދިފައި ނުވާކަމަށް ވިދާޅުވެ ޝައުނާ ވަނީ ފާޑު ވިދާޅުވެފަ އެވެ.

ފޮރިން ޕޮލިސީއަކީ ކޮބައިކަން ރައީސް ޑރ. މުޙައްމަދު މުޢިއްޒަށް އެނގިވަޑައިނުގަންނަވާ ކަމަށާއި އެއީ ވަރަށް ހިތާމަހުރި ކަމެއްކަމަށް ވެސް ޝައުނާ ވިދާޅުވި އެވެ.

އަދި ރައީސް ޑރ. މުޢިއްޒު އެންމެފަހުން ޗައިނާއަށް ކުރެއްވި ދަތުރުފުޅުން ވެސް އެންމެ އެދެވޭ ނަތީޖާއެއް ނުލިބޭ ކަމަށާއި މި ކަންކަމުން ފެންނަނީ މި ސަރުކާރުގެ ނާގާބިލުކަން ކަމަށް އޭނާ ވިދާޅުވިއެވެ.