ރާއްޖޭގައި ގާއިމުވެ ތިބި އިންޑިއާ ސިފައިން މި ގައުމުން ގެންދިއުމަށް އިންޑިއާ ސަރުކާރަށް، ރާއްޖޭގެ ކުރީގެ ކޮމިޝަނަރ އޮފް ޕޮލިސް ހުސެއިން ވަހީދު ގޮވާލައްވައިފިއެވެ.

އާދިއްތަ ދުވަހުގެ ރޭ ދަ ފްރޮންޓު އޮފީހުގައި ބޭއްވި ޖަލްސާގައި ރާއްޖޭގެ އެކި ކަންކަން ހުރި ގޮތަށް ހުސެއިން ވަނީ ނަޒަރު ހިންގަވާ ލައްްވާ އެކަންކަމާ ގުޅިގެން ފާޑުވިދާޅުވުމާ ނުރުހުން ވެސް އަމާޒުކުރައްވާފައެވެ.

ހުސެއިން ވިދާޅުވީ، މި ސަރުކާރަކީ ގިނަ ދަތިތަކާ މަދު ވަސީލަތްތަކާ ގިނަ ފިއްތުންތަކާ އެކު ރައްޔިތުން ގެނައި ސަރުކާރެއް ކަމަށާ ގައުމުގެ މުސްތަގުބަލާ މެދު ނާއުއްމީދު ނުވުމަށް ރައްޔިތުންގެ ކިބައިން އެދިވަޑައިގަންވާ ކަމަށެވެ. ނަމަވެސް ރައްޔިތުންގެ ބުރަ މަސައްކަތުން ގެނައި ސަރުކާރެއްގައި ރައްޔިތުންނަށް ވީ ވައުދު ފުއްދުމަކީ ވެރިންގެ ޒިންމާއެއް ކަމަށްވެސް ހުސެއިން ވިދާޅުވިއެވެ.

އެގޮތުން ހުސެއިން ވަނީ ވެރިކަމަށް އައުމަށް ރައީސް ޑރ. މުހައްމަދު މުއިއްޒު ބޭނުންކުރެއްވި އެންމެ ބޮޑު އެއް ސްލޯގަން "އިންޑިއާ އައުޓު" ފުރިހަމަ ނުވާކަން ފާހަގަކުރައްވާ އިންޑިއާ އަސްކަރިއްޔާ މި ގައުމުން ބޭލުމަށް ގޮވާލާފައެވެ. އެގޮތުން ހުސެއިން އިލްތިމާސް މިފަހަރު އަމާޒުކުރެއްވީ އިންޑިއާ ސަރުކާރަށެވެ.

ހުސެއިން އިތުރަށް ވިދާޅުވީ އޭނާއަކީ ވެސް އިންޑިއާއިން ޓްރެއިންވެފައި ހުންނެވި ފުލުހެއް ކަމަށާ ނަމަވެސް ރާއްޖެއަށް ވުރެ އިންޑިއާ އިސްކުރަން އޭނާގެ ޒަމީރުވެސް އަދި ލިބިފައި ހުރި ތަމްރީނުވެސް ތަން ނުދޭ ކަމަށެވެ.

އެހެންކަމުން ރާއްޖޭގެ ވެރިންނަށް ގައުމު ގުރުބާންކޮށް އިންޑިއާ މުހިއްމުވެގެން އުޅޭ ސަބަބާ މެދު ސީޕީ ހުސެއިން ވަނީ ސުވާލުއުފައްދަވާފައެވެ.

އިންޑިއާ ސިފައން ތިބުމާ ދެކޮޅަށް ސީޕީ ހުސެއިން އަޑު އުފުލާފައިވާއިރު، އިންޑިއާ މިލިޓަރީ ބޭރުކުރުމަށް ހިންގާ ކެމްޕެއިން "އިންޑިއާ އައުޓު" ހިންގަން ޖާގަ ނުދެއްވާނެ ކަމަށް ރައީސް މުއިއްޒުވަނީ ވިދާޅުވެފައެވެ. ނމަވެސް އެއީ ރައްޔިތުންނަށް ލިބިފައިވާ އަސާސީ ހައްގެއްގެ ބޭނުން ހިފައިގެން ކުރިއަށް ގެންދާ ހަރަކާތެއް ކަމަށާ އެކަން ނުހުއްޓުވޭނެ ކަމަށް ރައީސް އަބްދުﷲ ޔާމީން ވަނީ ވިދާޅުވެފައެވެ.