މިހާރު ރާއްޖެއަށް ކުރަމުންދާ ވިއްސާރައިގައި ހދ. ކުޅުދުއްފުށި ސިޓީއަށް ބޯކޮށް ވާރޭ ވެހި އެ ސިޓީގެ ގިނަ އަދަދެއްގެ ގެތަކަށް ފެންވަދެ ގެއްލުންތަކެއް ލިބިއްޖެއެވެ.

މިދިޔަ ހަފްތާ އާދީއްތަ ދުވަހުން ފެށިގެން މުޅި ރާއްޖެއަށް މޫސުން ވަނީ ގޯސްވެފައެވެ. މި ވިއްސާރައާ ގުޅިގެން ބައެއް ރަށްތަކަށް ބޮޑެތި ގެއްލުންތަކެއްވެސް ވިއެވެ.

ރާއްޖެއަށް މިހާރު ކުރަމުންދާ ވިއްސާރައާ ގުޅިގެން އުތުރުގެ ރަށްތަކަށް އޮރެންޖް އިންޒާރުވެސް ނެރެފައި ވެއެވެ.

ކުޅުދުއްފުށި ސިޓީގެ ޑެޕިޔުޓީ މޭޔަރު އަލީ އަހުމަދު ވިދާޅުވީ، އެ ސިޓީއަށް މިހާރު ކުރަމުންދާ ވިއްސާރައިގައި 100 އަށްވުރެ ގިނަ ގެއަށް ފެން ވަދެ ގެއްލުންތަކެއް ލިބިގެން ރިޕޯޓްކޮށްފައިވާ ކަމަށެވެ.

މިއަދު މެންދުރު ފަހު 3:00 އިން ފެށިގެން އެ ސިޓީއަށް ދަނީ ބޯކޮށް ވާރޭ ވެހެމުންނެވެ.

ވިއްސާރައިގައި އެ ސިޓީގެ ގެތަކަށް ގެއްލުންތެއް ލިބުނުއިރު، ލިބުނީ ކޮން ކަހަލަ ގެއްލުންތަކެއްކަން އަދި ސާފެއް ނޫނެވެ.

އެމްއެންޑީއެފް އިން ވިދާޅުވީ އެ ސިޓީގެ މަގުތަކުގައި ފެން ބޮޑުވުމާ ގުޅިގެން ފެން ހިންދުމުގެ މަސައްކަތުގައި އެމްއެންޑީއެފް ނޮދަން އޭރިއާ ކޮމާންޑް، ކުޅުދުއްފުށީ ފަޔަރ ސްޓޭޝަންގެ ސިފައިން ހަރަކާތްތެރިވަމުންދާ ކަމަށެވެ.