އިންޑިޔާއަށް ބަރޯސާނުވާނެކަމަށް ބުނެ ވެރިކަމަށް އައުމަށްފަހު ފެނިގެންދަނީ އިންޑިޔާ އަށް ބަރޯސާވެގެން އުޅޭ މަންޒަރުކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.

ރައީސް ޔާމީން މިފަދައިން ވިދާޅުވެފައި ވަނީ އާދިއްތަ ދުވަހުގެ ރޭ ފްރޮންޓް އޮފީހުގައި ކުރިށްދިޔަ ޖަލްސާގައި ވާހަކަ ދައްކަވަމުންނެވެ.

އެގޮތުން އެމަނިކުފާނު ވިދާޅުވީ ފެންނަނީ އަބަދުވެސް ސަލާމުގެ ނާށިގަނޑު ހިއްޕަވައިގެން އަވައްޓެރި ގައުމު އިންޑިޔާގެ އުނގަށް ވެއްޓޭ މަންޒަރުކަމަށެވެ.

އިގްތިޞާދީ ގޮތުން އިންޑިޔާއަށް ބަރޯސަވަންޏާ އިންޑިޔާއާއި ނުލައި އެއްވެސް ވަރަކަށް ނޫޅެވޭނެކަމަށް ވިދާޅުވެ ރައީސް ޔާމީން ވަނީ ފާޑުކިޔުން އަމާޒުކޮށްފައެވެ.

ރައީސް ޔާމީން އިތުރަށް ވިދާޅުވީ އެއްބަޔަކު ބުނަނީ އިންޑިޔާ އާއި ނުލައި އުޅެވޭކަށް ނެތްކަމަށެވެ. އެހެންނަމަވެސް އަނެެއް ބަޔަކު ބުނަނީ އިންޑިޔާ ގޮވައިން އުޅެވޭކަށް ނެތްކަމަށެވެ.

މި ސަރުކާރުން އިންޑިޔާއަށް އެއްވެސް ގޮތަކަށް ބަރޯސާނުވާނެކަމަށް ރައީސް ޑރ މުހައްމަދު މުއިއްޒު ޗައިނާއަށް ކުރެއްވި ދަތުރުފުޅު ނިންމަވާލެއްވުމަށްފަހު އެއާޕޯޓްގައި ނޫސްވެރިންނާ ވާހަކަދައްކަވަމުން ވަނީ ވިދާޅުވެފައެވެ.

އެގޮތުން އިންޑިޔާއިން ކާޑުގެ ބާވަތްތައް ގެނައުން ހުއްޓާލުމަށްޓަކައި ތުރުކީން ހަނޑޫ، ހަކުރު އަދި ފުށް ގެންނާނެ ކަމަށާއި، ބޭސް ފަރުވާ ހޯދުމަށް އިންޑިޔާ ނޫނަސް ދުބާއި ފަދަ ގައުމުތަކަށް އާސަންދަ ހަމަޖައްސަވާނެކަމަށް ވެސް ވިދާޅުވި އެވެ.

ނަމަވެސް މިހާރު ފެނިގެންދަނީ ކުރިންބުނި އެތި ކެންސަލްކޮށްލާ އިންޑިޔާގެ ފައިބުޑަށް ނާށިގަނޑު ހިފައިގެން ސަލާން ޖަހަން ދާ މަންޒަރެވެ.