20 ވަނަ ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ފަހު ޖަލްސާ މިރޭ ބޭއްވުމަށްފަހު މަޖިލީހުގެ ދައުރު ނިންމާލާ ޗުއްޓީއަށް ދިއުމަށް ނިންމައިފި އެވެ.

މިއަދުގެ ބޭއްވި މި ދައުރުގެ 32 ވަނަ ޖަލްސާ ނިންމަވާލައްވަމުން މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ މި ދައުރުގެ ފަހު ޖަލްސާ އޮންނާނީ މިރޭ 9:00 ގައި ކަމަށެވެ.

މި ހިނގާ ދައުރު ނިމޭނެ ކަމަށް ކުރިން އޮތީ އޯގަސްޓު 15 އަށެވެ.

އެހެންނަމަވެސް މަޖިލީހުގައި މިވަގުތު ނިންމުމަށް މުހިންމު މަސައްކަތްތަކެއް ހުރެގެން ދައުރު މި މަހުގެ 26، އާ ހަމައަށް ދިގުދަންމާލަން މަޖިލީހުން ފާސްކުރީ އޯގަސްޓު 13 ގައިކަން ފާހަގަކޮށްލެވެއެވެ.

މި މަޖިލީހުގެ ފުރަތަމަ ދައުރުގައި ސަރުކާރުގެ ފަރާތުން ޖުމްލަ 37 ބިލެއް ހުށަހަަޅަން ބަންޑާރަނައިބުގެ އޮފީހުން ނިންމި ނަމަވެސް މަޖިލީހަށް ހުށަހެޅީ 23 ބިލެވެ.