އެމްއެމްޕީއާރްސީ މައްސަލައިގައި އަބްދުއްރަހީމް އަބްދުﷲ (އަދުރޭ) އަދި އަދުގެ ރައީސް ޑރ މުހައްމަދު މުއިއްޒުގެ މައްޗައް ތަހުގީގެެއް ނުހިންގެވީ ކީއްވެތޯ، ދިވެހި ފުލުހުންގެ ހިދުމަތާ ރައީސް އަބްދުﷲ ޔާމީން އަބްދުލްގައްޔޫމް ސުވާލު ކުރައްވައިފި އެވެ.

ރައީސް ޔާމީން މިފަދައިން ސުވާލު އުފައްދަވާފައި ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ވާހަކަދައްކަވަމުންނެވެ.

އެގޮތުން އެމަނިކުފާނު ވިދާޅުވީ އެމްއެމްޕީއާރްސީ މައްސަލައިގައި މުއިއްޒު އަދި އަދުރޭގެ މައްޗައް ތަހުގީގެއް ނުހިންގެވުމުން، ރަނގަޅަށް މައްސަލަތައް ތަހުގީގު ކުރައްވާނެ ކަމަށް ދިވެހިރައްޔިތުން ފުލުހުންގެ ހިދުމަތައް ބަރޯސާއެއް ނުވެވޭނެކަމަށެވެ.

ރައީސް ޔާމީން އިތުރަށް ވިދާޅުވީ ކުރީގެ ސީޕީ އަބްދުﷲ ރިޔާޒް އެމްއެމްޕީއާރްސީ މައްސަލަ ތަހުގީގު ކުރެއްވީ ވަކި ބައެއްގެ މައްޗައް ކަމަށެވެ.

އަދުރޭ އަދި ރައީސް މުއިއްޒަށް އެމްއެމްޕީއާރްސީ މައްސަލަ ބަލަން ކެރިވަޑައިގަންނަވާނެތޯ ވެސް ރައީސް ޔާމިން ވަނީ އައްސަވާފައެވެ.

އެގޮތައް އެކަން ތަހުގީގު ކުރަންޏާ ބުޅާ ގޯނިން ބޭރުވާނެކަމަށް ވިދާޅުވެ ރައީސް ޔާމިން ވަނީ އެބޭފުޅުންނަށް ފާޑުކިޔުން އަމާޒުކުރައްވާފައެވެ.