ތ. ދިޔަމިގިލީގައި ގާއިމުކުރާ ފެން ޕްލާންޓުގެ މަޝްރޫއު ނިމި ނިމި އޮއްވާ ޕްލާންޓު އެހެން ރަށަކަށް ގެންދަން އުޅޭކަން ހާމަވެއްޖެއެވެ.

މައުލޫމާތު ލިބިފައިވާ ގޮތުގައި، ދިޔަމިގިލި ފެނުގެ ނިޒާމު ގާއިމުކުރުމުގެ މަޝްރޫއުގެ 80 ޕަސަންޓް މަސައްކަތް ނިމިފައި ވަނިކޮށް، އެ މަޝްރޫއަށް ގެނައި ފެން ޕްލާންޓް، އެ މަޝްރޫއު އެ ރަށުގައި ކުރިއަށް ގެންދާ ފެނަކަ ކޯޕަރޭޝަންއިން ވަނީ އެހެން ތަނަކަށް ގެންދިއުމަށް ރަށުގެ ޖެތީ މައްަޗަށް ނެރެފައެވެ. ނަމަވެސް ގެންދަނީ ކޮންތާކަށް ކަމެއް ސާފުވާ ގޮތެއް ނުވެއެވެ.

މައުލޫމާތު ލިބިފައިވާ ގޮތުގައި މިފަދައިން އަމަލުކޮށްފައި މިވަނީ އެ މަޝްރޫއުގެ ދަށުން ގޭގެއަށް ބޭނުންވާ ފެން ހޮޅިތައް ވައްދާ އާރްއޯ ޕްލާންޓް ބަހައްޓައި އިންސްޓޯލް ކުރުމާ ހަމައަށް ގޮސްފައިވަނިކޮށްކަން ފާހަގަކޮށްލެވެއެވެ.

މިކަމާ ގުޅިގެން ފެނަކަ އެމްޑީ މުއާޒް މުހައްމަދު ރަޝީދާ ސުވާލުކޮށްލުމުން ވަކި ޖަވާބެއް ދީފައިނުވެއެވެ.