މާލެ މަގުމަތީ މީހަކަށް ވަޅިން ބިރު ދައްކާ ފޯނެއް ފޭރިގަތް އަންހެން މީހާގެ ބަންދަށް މުއްދަތު ޖަހައިފިއެވެ.

މި މައްސަލައާ ގުޅިގެން ހައްޔަރުކޮށްފައި ވަނީ ގދ. ވާދޫ ބުރުނީގެ ޝާނާ މުހައްމަދު ޖުނައިދެވެ. އުމުރުން 26 އަހަރުގެ އެ އަންހެން މީހާ ހައްޔަރުކޮށްފައި ވަނީ އިއްޔެއެވެ.

މާލެ މަގުމަތިން މީހަކަށް ވަޅިން ބިރުދައްކާ ފޯނެއް ފޭރުނު އެ މީހާގެ ބަންދުގެ މުއްދަތު ޖަހަން މިއަދު ކޯޓަށް ގެންދިއުމުން އޭނާގެ ބަންދަށް 10 ދުވަސް ވަނީ ޖަހައިފައެވެ.

ނަމަވެސް އެ އަންހެން މީހާ ވަނީ އޭނާގެ މައްޗަށް ތުހުމަތު ކުރާ ތުހުމަތުތަކަށް އިންކާރު ކޮށްފައެވެ. އަދި މި ހާދިސާއާ ގުޅިގެން އެއްވެސް މީހަކަށް އަނިޔާއެއް ލިބުނު ކަމަށް ނުވާއިރު، ފޭރުނު ކަމަށް ބުނާ ފޯނު އެހެން މީހަކު އައިސް ފޯނުގެ ވެރިފަރާތައި ހަވާލުކޮށްފައިވާ ކަމަަށްވެސް ބުނެފައި ވެއެވެ.

ފުލުހުން ވިދާޅުވީ، މި މައްސަލަ ފުލުހުން ތަހުގީގު ކުރަމުންދާ ކަމަށެވެ.