ސީޕްލޭން "އެއާރ އެމްބިޔުލާންސް" ގެ ގޮތުގައި ބޭނުންކުރަން ހުއްޓާލަންޖެހޭ ކަމަށް ޓްރާންސްޕޯޓް މިނިސްޓަރ ކެޕްޓަން މުހައްމަދު އަމީން ވިދާޅުވުމުން، ރައީސް ޔާމީން އަބްދުލްގައްޔޫމް ފާޑު ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ފްރޮންޓް އޮފީހުގައި ކުރިޔަށް ދިޔަ ޖަލްސާފައި ކާނަލް ރިޓަޔާޑް އަހުމަދު ފަޔާޒް (ޕާޕާ)އާ ސުވާލު އަމާޒުކުރައްވަމުން ރައީސް ޔާމީން ވިދާޅުވީ ޓްރާންސްޕޯޓް މިނިސްޓަރު އަމީން ސީޕްލޭންގައި އެއާރ އެމްބިޔުލާންސްގެ ހިދުމަތް ދިނުމަށް ނިންމެވީ އެކަމަށް އެންމެ އެކަށީގެންވާ ދިރާސާއެއް ކުރުމެއްނެތި ކަމަށެވެ.

ސީޕްލޭންގައި ބަލިމީހުން އުފުލަންޖެހޭ ވަރު މަދުވުމުގެ ސަބަބުން އެ ޕްލޭންގެ ކުލަ ބަދަލިކުރުމަށްފަހު އޭގައި އަނެއްކާވެސް ފަތުރުވެރިން އުފުލަން ފެށިކަމަށް މިނިސްޓަރު އަމީން ވަނީ ވިދާޅުވެފަ އެވެ. އަދި ސީޕްލޭން އަކީ ހަމައެކަނި ދުވާލުގެ ވަގުތުތަކުގައި ބަލި މީހުން އުފުލޭ އެއްޗެއްކަމުން އެޔަށް އޮންނަ ޑިމާންޑް ދަށްވާ ވާހަކަ އަމީން ވިދާޅުވުމުން ރައީސް ޔާމީން ވަނީ އެ ވާހަކަތަކަށް ވަރަށް ބޮޑަށް ފާޑުވިދާޅުވެފަ އެވެ.

ރައީސް ޔާމީން ވަނީ އިންޑިޔާގެ ހެލިކޮޕްޓަރު ވެސް ދަތުރު ކުރަނީ ދުވާލުކަމަށާއި އޭރު އޭގައި ދަތުރުތައްކޮށްފައިވާ އަދަދު އަމީން އަތުގައި ނެތީތޯ އައްސަވާފަ އެވެ.

ރާއްޖޭގައި އެއާ އެމްބިޔުލާންސްގެ ހިދުމަތް ދިނުމަށްޓަކައި ސީޕްލޭނެއް ހަމަޖެއްސެވީ އެއްވެސް ބަލާލުމެއް ނެތިކަމަށް ވިދާޅުވެ ރައީސް ޔާމީން ވަނީ ރަސްމާލެ ރާޖޫ އަށް ދިންގޮތައް ސިފަކުރައްވާފަ އެވެ.