ވަޒީރުންގެ މަޖިލީހުގެ ބައެއް މެމްބަރުންނަށް ރުހުން ނުދޭން މަޖިލީހުގެ މެޖޯރިޓީ އޮތް އެމްޑީޕީއާ އަދި އެ ޕާޓީއާ ގުޅިގެން ސަރުކާރު ޒިންމާދާރުކުރުވަން މަޖިލީހުގެ ތެރެއިން މަސައްކަތްކުރުމަށް އެއް ގަލަކަށް އަރާފައިވާ ދަ ޑިމޮކްރެޓްސްގެ ފަރާތުުން ނިންމުމާ ގުޅިގެން ސަރުކާރުގެ ދިފާއުގައި މުޒާހަރާކޮށްފިއެވެ.

ރައްޔިތުންގެ މަޖިލިސް ބޭރުގައި ސަރުކާރުގެ ދިފާއުގައި ކުރި އިހުތިޖާޖުގައި ބައިވެރިވި ގިނަ މީހުންނަކީ ސަރުކާރުގެ އެކި ލެލެވްގައި ވަޒީފާގައި ތިބި މީހުންނެވެ. އެގޮތުން ސަރުކާރުގެ ސްޓޭޓު މިނިސްޓާރ ލެވެލް އިން ފެށިގެން ޕޮލިޓިކަލް ޑިރެކްޓަރުންގެ ލެވެލްގެ ބޭފުޅުންވަނީ މި އިހުތިޖާޖުގައި ބައިވެރިވެފައެވެ.

އިހުތިޖާޖުގައި ބައިވެރިވުމަށް ސަރުކާރުގެ ވެރިންނަށް އޯޑަރ އައީ ސީދާ ރައީސް އޮފީހުންކަމަށް ޗެނަލް13 އަށް ވަނީ އިތުބާރު ހުރި މަސްދަރަކުން މައުލޫމާތު ލިބިފައެވެ.

ވަޒީރުންނަށް ރުހުން ދިނުމާ މެދު ގޮތެއް ނިންމުމަކީ ރައްޔިތުންގެ މަޖިލީހުގެ ޒިންމާއެއް ކަމަށްވާއިރު ވޯޓަށް އެހުން ތާވަލުކުރީ އާދިއްތަ ދުވަހުގެ މެންދުރު 01:30 އަށެވެ. އެ ޖަލްސާ ވެސް ޕީޕީއެމް/ޕީއެންސީގެ މެމްބަރުން ހުރަސް އަޅާ ރިޔާސަތު ހިޞާރުކޮށް މައިކުތައް ފޮރުވުމުން ނުފެށުނެވެ.

ފޮރިން މިނިސްޓަރު މޫސާ ޒަމީރާއި ބަންޑާރަ ނައިބު އަހުމަދު އުޝާމް އާއި ހައުސިން މިނިސްޓަރު ޑރ. އަލީ ހައިދަރު އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ރުހުން ނުދޭން ދަ ޑިމޮކްރެޓްސް އިން ވަނީ ނިންމައިފައެވެ.

އެމްޑީޕީން ނިންމީ ފޮރިން މިނިސްޓަރު ޒަމީރަށް ރުހުން ދިނުމަށެވެ. އޭގެ ބަދަލުގައި އިކޮނޮމިކް މިނިސްޓްރު ސައީދަށް ރުހުން ނުދޭން ނިންމާފަައިވާއިރު ސަރުކާރު ތަމްސީލު ކުރާ މެމްބަރުން މަޖިލިސް ހުއްޓުވުމަކަށް ގެނައުމަކީ އެއީ ވެރިކަން ކުރާ ބާރުން ގާނޫނު ހަދާ ބާރަށް އަރައިގަތުން ކަމަށް އެމްޑީޕީއިން ސިފަކޮށްފައިވެއެވެ.