ރައީސް ޑރ މުހައްމަދު މުއިއްޒުގެ ކްރިމިނިލް ޖަސްޓިސް އެޑްވައިޒަރުގެ މަގާމުގައި ހުންނެވި ކުރީގެ ޕްރޮސެކިއުޓާ ޖެނެރަލްކަން ކުރެއްވި މުހުތާޒު މުހުސިން ފޮރިން މިނިސްޓްރީގެ ސްޓޭޓް މިނިސްޓަރެއްގެ މަގާމަށް ބަދަލުކޮށްފި އެވެ.

މުހުތާޒު ފޮރިން މިނިސްޓްރީއަށް ބަދަލުކުރި ސަބަބެއް ހާމަނުކުރި ނަމަވެސް ރައީސް އޮފީހުގެ އިސް ތަރުޖަމާނު ހީނާ ވަލީދު ވަނީ އޭނާ ފޮރިން މިނިސްޓްރީއަށް ބަދަލުކުރިކަން "ތޭރަ އޮންލައިން" އަށް ކަށަވަރު ކޮށްދެއްވާފަ އެވެ.

މުހުތާޒްގެ އެކްސް އެކައުންޓުގެ ބަޔޯ ގައި ވެސް މިހާރު ވަނީ "ފޯމާ ކްރިމިނަލް ޖަސްޓިސް އެޑްވައިޒާ އެޓް ޕްރެސިޑެންސީއެމްވީ" ކަމަށް ބަދަލުކޮށްފަ އެވެ.

ޕްރޮސެކިއުޓާ ޖެނެރަލްގެ މަގާމަށް މުހުތާޒް އައްޔަން ކުރައްވަން ރައީސް މުއިއްޒު ބޭނުންފުޅުވެވަޑައިގަންނަވާ ކަމަށް އިތުބާރު ހުރި މަސްދަރުތަކުން ވަނީ ހާމަވެފައެވެ.

އަދި ދާދި ފަހުން ފްރޮންޓް އޮފީހުގައި އޮތް ޖަލްސާގައި ރައީސް އަބްދުﷲ ޔާމީން އަބްދުލްގައްޔޫމް ވެސް ވަނީ އެފަދައިން ވިދާޅުވެފަ އެވެ.

މުހުތާޒު ޕީޖީ ކަމަށް އަންނާނެކަމަށް ސަރުކާރުގެ ބައެއް ބޭފުޅުން ބުނާއިރު އަނެއްބައި ބޭފުޅުން ބުނަނީ ޕީޖީކަމަށް އަންނާނީ އަދުރޭގެ ދަނބިދަރި ކަމަށެވެ.