ރައީސް މުއިއްޒު ބީއެމްއެލްއަށް އަމުރު ކުރަނީ ގާނޫނާ ހިލާފަށް ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.

އެކަމަނާ މިފަދައިން ވިދާޅުވެފައިވަނީ، ރޭ ބޭއްވި އެމްޑީޕީގެ ގައުމީ މަޖިލީހުގެ ކުއްލި ބައްދަލުވުމުގައެވެ.

މާރިޔާ ވިދާޅުވި ގޮތުގައި ރައީސް ޑރ. މުހައްމަދު މުއިއްޒު، ބޭންކު އޮފް މޯލްޑިވްސްގެ ނިންމުތައް ނިންމާނެ ގޮތުގެ އަމުރު ކުރައްވަމުން ގެންދަވަނީ ބޭންކިން ގާނޫނަށް ހިލާފަށެވެ.

ރުފިޔާ ކާޑުތަކުން ޑޮލަރުގެ މުއާމަލާތް ނުކުރެވޭ ގޮތަށް މިއަދު ބޭންކް އޮފް މޯލްޑިވްސްއިން ބަދަލު ގެނައީ ރައީސް މުއިއްޒު ސީދާ އަންގަވާފައި އޮތް ގޮތާ ހިލާފަށް ކަމަށް އިކޮނޮމިކް މިނިސްޓަރު، މުހައްމަދު ސައީދު ވިދާޅުމާ ގުޅިގެން ރައްދު ދެއްވާ މާރިޔާ އިތުރަށް ވިދާޅުވީ، ރައީސްވެސް މަސައްކަތް ކުރައްވަންވާނީ ގާނޫނާ އެއްގޮތަށް ކަމަށެވެ.

މިކަމަށް އިޝާރާތް ކުރައްވާ މާރޔާ ވަނީ އެމަނިކުފާނު، ބޭންކަށް ކަންކުރަންވީ ގޮތް އެންގެވުމަށް ބޭންކިން ގާނޫނުން ފުރުސަތު ދޭތޯ އޭނާ ސުވާލު އުފެއްދެވިއެވެ.

މާރިޔާ އިތުރަށް ވިދާޅުވީ އިއްޔެ ވެސް ބީއެމްއެލްއިން އެއް ކަމަކާ ގުޅިގެން ތިން ފަހަރު މެއިލް ކުރި ކަމަށާ ނަމަވެސް އެއް މެއިލް އަނެއް މެއިލްއާ ގުޅުމެއް ނެތް ކަމަށެވެ. އެހެންކަމުން ވާނުވާ ގައި ހުންނަވަން ޖެހިވަޑައިގަތްކަމަށެވެ.

މާރިޔާ މިފަދައިން ވިދާޅުވެފައިވާއިރު ޑޮލަރު މުއާމަލާތްތަކުގެ ލިމިޓަށް ބީއެމްއެލުން ގެނައި ބަދަލު އުވައިލަން އެ ބޭންކުން އިއްޔެ މެންދުރު ފަހު ނިންމީ އެމްއެމްއޭގެ އިރުޝާދުގެ ދަށުން ކަމަށް ބީއެމްއެލުން ހާމަކުރި ނަމަވެސް އެކަން އެހެން ކުރީ އެ ބޭންކުގެ ސީއީއޯ ރައީސް އޮފީހަށް ހާޒިރުކޮށް ރައީސް އޭނާއަށް ބިރު ދައްކާ ގާނޫނުގެ ތެރެއަށް އަތް ބޭނުމުންކަން ވަނީ ހާމަވެފައެވެ.