ކުޑަކުއްޖަކަށް އަނިޔާކުރި މައްސަލަ އެއްގައި އަންހެނަކު ހޯދަން އިއުލާން ކޮށްފިއެވެ.
ފުލުހުން މިއަދު ކުރި އިއުލާނުގައި ހޯދަން އެ އިދާރާއަށް ހާޒިރުކުރަން ބޭނުންވަނީ ގދ. ގައްދޫ, ދިލާވަރުގެ އުމުރުން 25 އަހަރުގެ ޝަފުރާ އަބްދުﷲ އާދަމް ކަަމަށް ހާމަކޮށްފައިވެއެވެ.
ގދ. ގައްދޫ ޕޮލިސް ސްޓޭޝަނުން ތަހުގީގު ކުރަމުންދާ މައްސަލައަކަށް ހާޒިރުވުމަށް ޝަފުރާއަށް އަންގާފައިވަނީ އަންނަ ހޯމަ ދުވަހުގެ ހެނދުނު 10 ޖަހާއިރު ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިން ނުވަތަ ގައްދޫ ޕޮލިސް ސްޓޭޝަނަށް ކަމަށް ފުލުހުންގެ އިއުލާނުގައި ބުނެފައިވެއެވެ.
ފުލުހުން ބުނީ ޝަފުރާ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާ ކަމަށެވެ.
އެ އިއުލާނުކޮށްފައިވަނީ ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން ކަމަށް ފުލުހުން ބުނެފައިވެއެވެ.
ފުލުހުން ބުނީ ޝަފުރާ ހާޒިރުކުރަނީ ތުހުމަތުކުރެވޭ މައްސަލައިގެ ތަހުގީގަށް ސުވާލުކުރުމަށް ކަމަށެވެ.
