ކައުންސިލްތަކުގެ ބާރު ކުޑަވާ ގޮތަށް ފަރުމާ ކޮށްފައިވާ އާބަން ޑިވެލޮޕްމަންޓުގެ ބިލު ތަސްދީގު ނުކުރަން ހޮވާލައިފިއެވެ.
މިފަދައިން ގޮވާލާފައިވަނީ، މޯލްޑިވްސް ލޯކަލް ކައުންސިލް އެސޯސިއޭޝަން (އެމްއެލްސީއޭ) އިންނެވެ.
ކައުންސިލްތަކުގެ ޖަމްއިއްޔާއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނ. އަތޮޅު ކައުންސިލުގެ ރައީސް މުހައްމަދު ބަޝީރު ވިދާޅުވެފައިވަނީ އެލްޖީއޭ ވަޒީރަށާއި މަޖިލިސް މެންބަރުންނަށް ވެސް ބިލުގައިވާ އެއްޗެއް ރަނގަޅަށް ނޭނގޭ ކަމަށެވެ. އެހެންކަމުންނާ އެއްކޮށް ބިލު ތަސްދީގު ނުކޮށް އަލުން މަޝްވަރާކުރުމަށް އެ އެސޯސިއޭޝަންގެ ފަރާތުން އޭނާ ވަނީ ރައީސް މުހައްމަދު މުއިއްޒަށް ގޮވާލާފައެވެ.
ބަޝީރު އިތުރަށް ފާހަގަކުރީ 2019 ގައި ގާނޫނަށް ގެނެވުނު އިސްލާހާއި އެކީގައި ކައުންސިލުތަކަށް ބާރުތަކެއް ލިބި ހިންގައި ގަނެވުނީ އަދިކިރިޔާ ކަމަށެވެ. ނަމަވެސް، މި ބިލުގެ ސަބަބުން އެ ބާރުތައް ހަނިވެ ކައުންސިލުތަކުން ހަދައިފާ ހުރި ލޭންޑް ޔޫސް ޕްލޭންތައް ބޭނުން ނުކުރެވޭނެ ކަމަށް އޭނާ ވިދާޅުވިއެވެ.
ބަޝީރުގެ އިތުރުން ވެސް އެ ބައްދަލުވުމުގައި ބައިވެރިވި ބޭފުޅުންވަނީ ބިލާ ގުޅިގެން ހުރި ކަންބޮޑުވުންތައް ހިއްސާކުރައްވާފައެވެ.
އެގޮތުން ބިލުގެ ސަބަބުން އަތޮޅު ކައުންސިލުތައް އެއްކޮށް އެކަހެރިވެގެންދާ ކަމަށާ އަދި ކައުންސިލުތަކަށް ލިބިގެންދާ އެތައް ބާރެއް ހިފެހެއްޓި ސަރުކާރުގެ އޮތޯރިޓީއެއްގެ ތެރެއަށް އެ ބާރުތައް ދާ ކަން ފާހަގަކޮށް ރައްޔިތުންގެ އަޑު އެކީގައި ކެނޑިގެންދާނެކަމަށް ހާމަކޮށްފައިވެއެވެ.
