ކުރީގެ ރައީސް އިބްރާހިމް މުހައްމަދު ޞާލިހްގެ ސަރުކާރުން ވެރިކަން ނިމެން ކައިރިވެފައިވަނިކޮށް އެއްވެސް އުޞޫލެއްނެތި ބަހާލި "ގެދޮރުވެރިޔާ ސްކީމްގެ" 4000 ފްލެޓް މައްސަލަ އޭސީސީން ބަލަން ފަށާފައިވާއިރު، މައްސަލަ މި ހަފްތާގެ ތެރޭގައި ނިންމާނެ ކަމަށް އޭސީސީން ބުނެފިއެވެ.

އޭސީސީން މީޑިޔާ ގްރޫޕަށް ފޮނުވާފައިވާ މެސެޖްގައި ބުނެފައިވަނީ ގެދޮރުވެރިޔާ ސްކީމްގެ ދަށުން އިއުލާންކުރި 4،000 ފްލެޓާ ގުޅިގެން ކޮމިޝަނަށް ހުށަހެޅުނު މައްސަލައިގައި ފްލެޓާ ގުޅޭ ކަންކަން މަޑުޖައްސައިލުމަށް ކޮމިޝަނުން އެންގި އެންގުމާ މެދު ކޮމިޝަނުން މި ހަފްތާ ތެރޭގައި ގޮތެއް ނިންމާނެކަމަށެވެ.

ނިމިދިޔަ ސަރުކާރުން ދޫކުރި 4000 ފްލެޓް ހަވާލު ކުރުން އޭސީސީ އިން ހުއްޓުވާފައި ވަނީ އެކަމާ ގުޅިގެން އާންމުން ހުށަހެޅި ޝަކުވާތަކާ ގުޅިގެންކަން ފާހަގަކޮށްލެވެއެވެ.

ރައްޔިތުން ކުރި ޝަކުވާތަކުގައި ވަނީ، އެ ފްލެޓްތައް ދޫކޮށްފައި ވަނީ ޝަރުތު ހަމަނުވާ މީހުންނަށް ކަމަށާއި ޕޮއިންޓް ދިނުމުގައި އޮޅުވާލާފައިވާ ކަމަށެވެ.

ފްލެޓުތަކާ ގުޅޭގޮތުން އޭސީސީއިން ހިންގާ ތަހުގީގަށް ހައުސިން މިނިސްޓްރީން ވަނީ މިދިޔަ ޑިސެމްބަރު މަހު ފްލެޓް ޕޯޓަލް އެކްސެސް ވެސް އެ ކޮމިޝަނަށް ދީފައެވެ.